Ǵalymdar Shyǵys Qazaqstan tarıhyn zertteý boıynsha joba ázirledi

ÓSKEMEN. QazAqparat - Ártúrli salalardaǵy ǵalymdar, sarapshylardan quralǵan jumys toby óńirdegi «Rýhanı jańǵyrý» Prezıdent baǵdarlamasyn júzege asyrýdyń negizi bolatyn ondaǵan jobany iriktep aldy, dep habarlaıdy «QazAqparat» HAA tilshisi ShQO ákiminiń baspasóz qyzmetine silteme jasap.

«Shyǵys Qazaqstannyń órkenıettik fenomeni» jobasy oblystyń ejelgi tarıhyn zertteý úshin ǵylymı platforma qurýǵa, tarıhı-mádenı jáne etnogenetıkalyq úderisterdiń kópqyrlylyǵyn kórsetýge, memorıaldyq mádenıettiń biryńǵaı keshenin tanystyrýǵa múmkindik beredi. Oblysta osyndaı aýqymdy jobalar júzege asyrylyp jatyr. Byltyrdan beri óńir basshysy Danıal Ahmetovtyń bastamasymen Shyǵys Qazaqstan aýmaǵynda qazaqstandyq arheologtar Belgııa, Ulybrıtanııa, Vengrııa, Germanııa, Italııa, Polsha, Reseı, AQSh pen Japonııadan kelgen jetekshi ǵalymdarmen birlesip jumys isteýde. Búginde Qazaqstannyń ejelgi tarıhyn zertteýde kóp mańyzǵa ıe bes arheologııalyq nysan zertteldi. Oblystyq tarıhı-ólketaný mýzeıine úsh myń jańa jádiger berildi.