Ǵalymdar shızofrenııany emdeýdiń tyń ádisin tapty
ASTANA. QazAqparat - Brıtan ǵalymdary galıýtsınatsııalar kezinde sóıleıtin daýystardyń kóshirmesin jasap, sol arqyly shızofrenııaǵa ushyraǵandardy emdep kórdi, dep habarlaıdy QazAqparat tilshisi The Lancet Psychiatry jýrnalyna silteme jasap.
«Shızofrenııa kezinde naýqastardyń 70 paıyzy san alýan daýystardy estıdi. Kózine elesteıtin obrazdarmen sóılesedi. Ol elester naýqasqa urysady, til tıgizedi, ózine de, basqalarǵa da qaýipti áreketterge úndeıdi. Aýrýdyń osy ispetti belgilerin dári-dármekpen azaıtýǵa bolady. Alaıda ondaı terapııadan keıin de daýystar joǵalmaıdy», - deıdi zertteýdiń avtory, professor Tom Kreıg.
Zertteý kezinde 18-65 jas aralyǵyndaǵy 150 naýqasty synaqtan ótkizdi. Olardyń barlyǵy - shızofrenııa pen psıhozben aýyratyndar. Aldymen naýqastardy eki topqa bóldi. 75 adam psıhıatrda emdelse, taǵy 75 naýqas jańa terapııaǵa qatysty. Barlyǵy dári-dármek ishýdi toqtatqan joq.
Jańa ádis boıynsha aldymen naýqastardyń jıi estıtin daýystary kompıýterlik baǵdarlamaǵa salynyp, kóshirmesi jasaldy. Al dáriger dál sol daýyspen basqa bólmede otyrǵan naýqaspen sóılesip turdy. Ondaı terapııa bir jarym aıǵa sozyldy. Nátıjesinde galıýtsınatsııalar azaıdy, naýqastardyń kúızeliske túsýi sıreı bastady.
Týra 12 aptadan keıin 75 naýqastyń jeteýi dybystyq galıýtsınatsııalardyń múldem estilmeı ketkenin jetkizdi. Al psıhıatrǵa kóringenderdiń ishinde ondaı tek eki adam ǵana boldy.
