Ǵalymdar shaıdyń jańa paıdaly qasıetterin anyqtady
ASTANA. QazAqparat - Shaı júrek aýrýlarynan basqa aýrýlardan ólim qushýdy 24 paıyzǵa tómendetedi. Bul frantsýzdar arasynda shaı men kofeni tutynýdyń densaýlyqpen baılanystylyǵyna qatysty derekterdi taldaý barysynda anyqtalyp otyr.
Zertteý nátıjeleri týraly eýropalyq kardıologııalyq qoǵam konferentsııasynda aıtyldy, dep habarlady Rosbalt.
Frantsýz ǵalymdary barlyǵy 131 401 adamǵa saýalnama júrgizgen, olar Parıjde derttiń aldyn alý jónindegi medıtsınalyq ortalyqta tekserýden ótti. Munda synaqtan ótýshi kofe/shaı ishpeıtinin nemese kúnine ony 1 keseden 4 kesege deıin ishetinin bolmasa 4 keseden artyq ishetinin - qajettisin belgileýi tıis boldy.
Ár respondentti ǵalymdar úsh jarym jyl boıy baqylady. Osy kezeńde olardyń ishinen júrek-qan tamyrlary aýrýlarynan 95 adam, al basqa sebepterden - 632 adam kóz jumǵan.
«Jalpy kofeni tutyný aýrýlardyń týyndaý qaterin arttyrsa, shaıǵa degen qumarlyq mundaı qaterdi tómendetken. Sonymen birge genderlik zańdylyqty anyqtadyq - er adamdar kofeni kóp ishse, áıelder er adamdarǵa qaraǵanda, shaıdy kóp ishedi eken», - deıdi Rene Dekart atyndaǵy Parıj ýnıversıtetiniń qyzmetkeri Nıkolas Danchın.
Shaıdy tutynýdyń júrek-qan tamyrlary júıesine baılanysty emes aýrýlardan ólim-jitimge ushyraý kólemin 24 paıyzǵa tómendetýin ǵalymdar onyń quramynda antıoksıdanttardyń bolýymen baılanystyrdy.
