Ǵalymdar: reseılikterdiń túbine araq jetti
ASTANA. QazAqparat - Reseıdegi er adamdardyń tórtten biri 55-ke jetpeı ómirden ótedi. Ǵalymdardyń halyqaralyq toby buny alkogoldik ishimdikterden kórip otyr.
Olardyń pikirinshe, alkogoldik ishimdikterdiń ishinde ásirese araq adamǵa óte zııandy, dep habarlaıdy Bı-Bı-Sı. Lancet medıtsınalyq jýrnalynda Reseıdiń Barnaýl, Bıısk, ján Tomsk qalalarynda 1999-2010 jyldar aralyǵynda alkogoldi tutyný mádenıetin zertteý nátıjesi jarııalandy. Zertteýshiler Reseıdegi er adamdardyń tórtten biri 55-ke jetpeı ómirden ótetinin atap ótken. Olardyń kóbisi araqty kóp ishkender bolyp shyqty. Іshimdikke qatty salynǵandar ártúrli qaterge tap bolady. Aıtalyq ishimdikten ýlanyp qalady, ózine-ózi qol jumsaýǵa deıin baryp, tamaq jáne baýyr qaterli isigine shaldyǵyp jatady. Ulybrıtanııada halyqtyń 7 paıyzy ǵana bolmasa, qalǵan kópshiligi 55-ten asyp ómir súredi eken. Zertteý avtorlarynyń biri, Oksford ýnıversıtetinen Rıchard Petonyń sózine qaraǵanda, orta eseppen alǵanda eresek reseılik azamat úshin jylyna 20 lıtr araqtan keledi.
