Ǵalymdar omartashylyqtyń qashan paıda bolǵanyn anyqtady
ASTANA. QazAqparat - Ǵalymdar adamdardyń omartashylyqpen bizdiń dáýirimizge deıin aınalysa bastaǵanyn bilgen. Aralar kóne tıyndar men jartasqa salynǵan sýretterde beınelengen.
Alaıda bal men balaýyzdyń alǵash ret qashan jınalǵany týraly naqty arheologııalyq málimetter buǵan deıin tabylmaǵan edi. Sońǵy zertteýler adamdar bul kásipti sonaý tas ǵasyrda ıgergenin kórsetti, dep jazady epochtimes.ru.
Omartashylyqtyń jasyn anyqtaý úshin, Brıstol ýnıversıtetiniń ǵalymy Rıchard Evershed basqarǵan halyqaralyq ǵalymdar toby 6 myńǵa jýyq balshyqtan jasalǵan zattardyń synyqtaryn zerttedi. Olardyń jasy 6-9 myń jyldy quraǵan. Adamdar sol kezde kóshpeli ómir saltynan otyryqshy ómir saltyna ótken. Buıymdar Eýrazııa men Soltústik Afrıkanyń 150 aýdanynan alyndy.
Zertteýshiler ejelgi zamanǵy adamdar balaýyzdy jebeler men naızalardy jabystyrý, sondaı-aq ydysqa sý juqpaıtyn qasıetter berý úshin paıdalanǵanyn shamalap otyr. Al bal bolsa, olar úshin táttiniń jalǵyz kózi bolǵan.
