Ǵalymdar Nefertıtıdiń qabirin tapqanyna senimdi
Ǵalymdar Nefertıtıdiń qabirin tapqanyna senimdi
ASTANA. QazAqparat - Egıpette jumys jasap jatqan arheologtar Týtanhamonnyń qabirindegi jasyryn bólmeden ejelgi egıpet patshaıymy Nefertıtı jerlengen degen tujyrymǵa dálelder tabylǵanyna senimdi, dep habarlady Bı-bı-sı.
Egıpettiń ejelgi eskertkishterdi qorǵaý mınıstri Mamdýh ál-Damatı sarapshylar Lýksordaǵy Týtanhamon qabiriniń astynan bólme tabylǵanyna 90 paıyz senimdi, dep málimdedi. Olar muny ejelgi eskertkishke nuqsan keltirmeıtin arnaıy jabdyqtyń kómegimen qabirdi skanırleý arqyly anyqtaǵan.
Brıtandyq egıptolog Nıkolas Rıvs Nefertıtı jerlengen jerdi odan ári zerttemek. Patshaıym zamanynyń óte sulý adamy bolǵan.
Nıkolas Rıvs Týtanhamon shamamen 1323 jyly 19 jasynda kenetten qaıtys bolǵan, sondyqtan ony áýelde Nefertıtıge arnalǵan qabirdiń aldyńǵy jaǵyna jerlegen dep sanaıdy. Keıbireýler Týtanhamon Nefertıtıdiń uly dep sanaıdy. Onyń qabiri 1922 jyly tabylǵan bolatyn. Týtanhamonnyń qabiri tabylǵan basqa perǵaýyndarǵa qaraǵanda, eshbir búlinshilikke ushyramaǵan. Onda eki myńǵa jýyq zattar bolǵan. Doktor Rıvs qabirdiń keıbir qurylymdyq erekshelikteri onyń áýelde perǵaýynǵa emes, patshaıymǵa ázirlengenin kórsetedi dep sanaıdy. Bul paıymdaýlardy basqa belgili egıptologtar ázirge qýattaı qoıǵan joq.
