Ǵalymdar: Mys - obyrdy jeńýdegi jańa baspaldaq
ASTANA. QazAqparat - Obyrdyń keıbir túrlerine mys aýadaı qajet. Sondyqtan bul jańalyq obyrdyń osal tusy bolýy ábden múmkin, dep jazady The Telegraph. Budan shyǵatyny, mystyń sińýine tosqaýyl qoıatyn dáriler zamanaýı obyrǵa qarsy terapııanyń bet-beınesin ózgertýi múmkin.
BRAF geninde mýtatsııasy bar obyr ósip-ónýi úshin mysqa zárý. Olardyń qataryna melanoma men teri obyryn jatqyzýǵa bolady. Dıýk ýnıversıteti medıtsınalyq mektebiniń professory Krıstofer Kaýnterdiń aıtýynsha, BRAF geni jasýshalardy retteýge jáne dıfferentsıatsııalaýǵa qatysady. Al obyrdyń belsendi jasýshalary shekten tys beıdıfferentsııalanǵan. Mýtatsııaǵa ushyraǵan BRAF geni jasýshalardy ósýge ıtermelegen kezde, olar qalyptan tys beınede damı bastaıdy.
Zerthanalyq tájirıbeler kórsetkendeı, mysty sińirý protsesin buǵaýlaý obyr jasýshalarynyń damýyn tejegen. Dál osyndaı nátıjeni Vılson aýrýyn emdeýge arnalǵan dáriler de kórsetken. Bul - dene tininde mystyń jınalyp qalatyn genetıkalyq aýrýy. Mystyń jınalyp qalýynan mı men baýyr aýrýǵa shaldyǵady.
Sondyqtan mundaı dárilerdi melanoma, ókpe jáne qalqansha beziniń obyry men basqa da obyr túrlerin emdeýge paıdalanýǵa bolady. Klınıkalyq zertteý qoldaý tapty. ıAǵnı jýyq arada Dıýk ýnıversıtetiniń ǵalymdary melanomamen aýyratyn naýqastardaǵy mystyń deńgeıin tómendetetin dárilerdi tekseristen ótkize bastaıdy.
