Ǵalymdar Lenınniń ólimine qatysty jańa joramaldy alǵa tartty
ASTANA. 7 mamyr. QazAqparat - Ǵalymdar Vladımır Lenın ýlaný nátıjesinde qaıtys boldy dep seziktenýde,
dep habarlaıdy Lenta. rý The Washington Post -ke silteme jasap.
Keńestik kóshbasshysynyń ólimin amerıkandyq nevrolog Garrı Vınters pen reseılik tarıhshy Lev Lýre anyqtaýǵa tyrysqan kórinedi. Olar ózderiniń jumys nátıjesin Merılend ýnıversıteti janyndaǵy Medıtsınalyq mektebinde túrli tarıhı qaıratkerlerdiń ólimine arnalǵan jyl saıynǵy konferentsııada usyndy.
Lenın 1924 jyly 21 qańtarda 53 jasynda qaıtys boldy. Resmı qorytyndy boıynsha ol bas mıy tamyrlary aterosklerozynyń taralýynan zardap shekken. Lýreniń sózine qaraǵanda, Lenınniń jaǵdaıy birtindep nasharlaı bastaǵan. 1921 jyly ınsýlt alǵan. Degenmen de tarıhshynyń paıymdaýynsha, keńestik kóshbasshy ınsýltten keıin qaıta qalpyna kelip, 1924 jyldyń basynda ańshylyqqa shyǵýǵa da qaýqarly bolǵan.
Vınters Lenınniń aýrýynyń tarıhyn jáne onyń múrdesin tekserý hattamasyn zerdeleı kele, saıasatker óliminen birneshe saǵat buryn belsendi bolǵanyn jáne áńgimelesip, tyń júrgenin qorytyndylady. Alaıda, ólim aldynda ol birneshe márte qalsh-qalsh etip ustamaly aýrýdy basynan keshken. Nevrologtyń paıymdaýynsha, bul ınsýlttyń klassıkalyq belgilerine uqsamaıdy. Osyǵan baılanysty baıandamanyń avtorlary keńestik saıası qaıratker ýlanyp óldi degendi tuspaldap otyr.
