Ǵalymdar: Qyzyl et jeýden bas tartý adamdy kúızeliske ushyratady
ASTANA. QazAqparat - adam densaýlyǵy úshin qyzyl ettiń zııandylyǵy týraly osy kezge deıin aıtylyp kelgen edi. Ásirese, áıel adamdarǵa tek balyq nemese qus etin tutyný usynylatyn. Alaıda professor Maıkl Rassel bul paıymdaýmen kelispeıtinin bildirip, qyzyl etten bas tartý adamnyń densaýlyǵy men syrtqy kelbetine keri áserin tıgizýi múmkin dep sanaıdy, dep jazady Medicinform.
Ǵalym óz zertteýi barysynda qus etiniń de, balyqtyń da qyzyl ette bolatyn janýarlar aqýyzynyń ornyn toltyra almaıtynyn anyqtady. Sondaı-aq janýarlar etinde qannyń qyzyl túıirshikterin jasaý úshin qajetti temir mol, al onyń tapshylyǵy anemııa aýrýyn týdyryp, adamnyń jıi sharshaýyna, jumys qabiletiniń tómendeýine, uıqysynyń buzylýyna, kúızeliske ushyraýyna ákeledi. Sonymen qatar tyrnaq pen shashtyń synǵyshtyǵy, teriniń túleýi baıqalady, kózdiń asty qaraıyp ketedi. Temir jetispeýshiliginiń adam aǵzasynyń reprodýktıvti qyzmetine de keri yqpaly bar.
AQSh aýrýlardy baqylaý jáne aldyn alý ortalyǵy mamandarynyń pikirinshe, maıly emes et qandaǵy holesterın tepe-teńdiginiń saqtalýyna septigin tıgizip, júrek-qan tamyry júıesin tózimdi etedi ári zat almasý protsesterin retteıdi. Al bul óz kezeginde adamnyń shashynyń, tyrnaqtarynyń, terisiniń kúıin jaqsartady.
Sarapshylar sondaı-aq densaýlyq úshin qajetti elementterdi teńiz ónimderinen de tolyqqandy alý múmkin emes ekenin aıtady. Sondyqtan vegetarıandyq dıetasyn ustanatyndar ózderiniń as-aýqaty týraly oılanǵandary jón, deıdi olar.
