Ǵalymdar qys mezgilindegi eń aýyr kúndi anyqtady
ASTANA. 9 qańtar. QazAqparat - Kóptegen adamdar qysta jumystaryna jaryq túskenge deıin baryp, odan úıge qarańǵy túskende bir-aq qaıtady. Mundaı kún sáýlesiniń jetkiliksizdigi jaǵdaıynda adamdarda aıtarlyqtaı psıhıkalyq aýytqýlar týyndaıdy, dep eskertedi Mental Health Research UK uıymy. Eger adam kún saıyn ózine qajetti kún sáýlesiniń mólsherin qabyldamasa, bul onyń kúızeliske ushyrap, kóńil-kúıiniń tómendeýine sebep bolady, dep jazady The Daily Mail.
2000 adamǵa júrgizilgen zertteýler nátıjeleri árbir on adamnyń úsheýi qys aılarynda tań jaryǵy bilingenge deıin oıanyp, úılerine kún batqan soń ǵana oralatynyn kórsetti. Olardyń 50% jumys oryndarynda tabıǵı jaryq kózderiniń jetkiliksizdiginen zardap shegetinin bildirdi. Al, árbir onynshy adam jumys ornynda tabıǵı jaryqtyń múldem joq ekenin atap ótti. Sondaı-aq, ǵalymdar qys mezgiliniń eń aýyr kúni - qańtar aıynyń úshinshi dúısenbisi ekenin anyqtady. Sebebi, bul kezde adamǵa sýyq aýa raıynyń áseri, ótken jyldardan qalǵan qaryzdarynyń bolýy, Jańa jyldy toılaǵannan keıin del-sal kúıge enýi jáne jumysqa degen yntasynyń tómendeýi baıqalady.
