Ǵalymdar: Kúnine 2-3 kese shaı ishý adamnyń súıekterine asa paıdaly
ASTANA. QazAqparat - Shanhaı gospıtalindegi qytaılyq mamandar kúnine 2-3 kese shaı ishý adamnyń býyn súıekterin nyǵaıtyp, osteoporoz aýrýynyń aldyn alatynyn anyqtady.
Shaı ishý er adamdar úshin de, áıel adamdar úshin de asa paıdaly bolyp shyqty, ol súıektiń syný qaterin 37%-ǵa azaıtady. Ókinishke oraı, kofeniń mundaı qasıetteri baıqalmady, dep habarlaıdy Kedem.
Ǵalymdar aldynda júrgizilgen 14 zertteýdiń qorytyndylaryna taldam jasap, adamnyń tamaqtanýy men súıeginiń synǵyshtyǵy arasyndaǵy baılanysty anyqtady.
200 myń adamǵa júrgizilgen zertteý málimetteri boıynsha shaıdy súısinip ishetinderdiń arasynda súıek synǵyshtyǵy azaıatyny málim boldy. ıAǵnı, kúnine 1-2 kese shaı ishken jandarda bul qater 28%-ǵa, 2-3 kese shaı ishkenderdiń arasynda - 37%-ǵa, al 3-4 kese shaı ishkenderdiń arasynda - 21%-ǵa tómendegen.
Ázirge mamandar 2-3 kese shaıdyń súıekke nege munshalyqty paıdaly ekenin naq basyp aıta almaıdy, sebebi ol úshin qosymsha zertteýler júrgizý qajet. Tek, olardyń boljamynsha, osynaý sýsyn quramyndaǵy flavonoıdtar jańa súıek tininiń túzilýine septesedi eken. Ári shaıdaǵy ftorıd, kaltsıı men mıneraldar da súıekti nyǵaıtyp, myqty etedi.
