Ǵalymdar koronavırýstan 90 paıyz qorǵaıtyn vaktsına jasap shyǵardy

LONDON. QazAqparat – Aldyn ala nátıje kórsetkendeı, ǵalymdar koronavırýstan 90% qorǵaıtyn tıimdi vaktsınany jasap shyǵardy, dep habarlaıdy QazAqparat BBC agenttigine silteme jasap.

Pfizer jáne BioNTech ázirleýshi kompanııalar bul oqıǵany ǵylym men adamzat úshin uly kún dep atady. Klınıkalyq synaqtarǵa álemniń alty elinde 43500 adam qatysyp, onyń esh janama áseri bolmady. Ázirleýshiler jańa vaktsınany qarasha aıynyń sońynda qoldanyp kórmek. Sol úshin jedel sertıfıkattaý protsedýrasyna ótinish berýdi josparlap otyr.

Klınıkalyq zertteýlerdiń sońǵy satysynda qazir onǵa jýyq túrli vaktsına tur, alaıda bul – óziniń joǵary tıimdiligin dáleldegen birinshi vaktsına. Adamnyń ımmýndyq júıesine vırýstyń genetıkalyq kodynyń bir bóligi engiziledi. Sóıtip ol vırýspen kúresýge baǵyttalady.

Aldyńǵy synaqtar kórsetkendeı, vaktsına organızmde antıdeneler jáne koronavırýspen kúresetin T-lımfotsıtterdiń paıda bolýyn yntalandyrady. Vaktsınanyń eki dozasy úsh apta úzilispen engiziledi. AQSh, Germanııa, Brazılııa, Argentına, Ońtústik Afrıka Respýblıkasy jáne Túrkııadaǵy klınıkalyq zertteýler kórsetkendeı, ekinshi ekpeden soń 7 kún ótkende koronavırýstan 90% qorǵanysqa qol jetkizildi.