Ǵalymdar keı kishkene balalardyń ne sebepti ashýshań bolatynyn anyqtady
ASTANA. QazAqparat - Frantsııadaǵy Densaýlyq saqtaý jáne medıtsınalyq zertteýler ınstıtýtynyń mamandary birqatar tájirıbe júrgizip, jaqyndarynyń temeki tartýy balalardyń agressıvti qylyǵynyń damýyna sebep bola alatynyn baıqady, dep jazady sheteldik BAQ.
Zertteýshiler temeki tútini balanyń densaýlyǵymen birge onyń qylyǵyna áser etedi dep sanaıdy.
Tájirıbege shamamen bes myń oqýshy qatysty. Mamandar áıelderdiń júkti bolǵan kezinde jáne odan keıin temeki shegýi jaǵdaılaryn eskerdi. Temeki tútinin jutqan balalarda joǵary emotsıonaldyq turaqsyzdyq ańǵaryldy.
Ásirese, ekiqabat bolǵanda jáne bosanǵannan keıin de teris áreketten arylmaǵan analardyń balalary kóbirek zardap shegedi. Bul balanyń agressıvti bolýyna yqpal etedi. Ǵalymdar jaqyndarynyń temeki shegýi jáne onyń tútinin balanyń jutýy olardy agressııaǵa jáne emotsıonaldyq turaqsyzdyqqa ıteretin jaǵymsyz faktorlardyń tizimine resmı túrde engizýdi usyndy.
