Ǵalymdar Qazaqstannyń qazirgi zaman tarıhyn jazyp shyqpaq

ASTANA. QazAqparat - Qazaqstan tarıhshylary elimizdiń tarıhyn jańasha jazyp shyǵý úshin eńbektenýde. Bul týraly búgin ótken «Máńgilik El» ulttyq ıdeıasy aıasynda Otan tarıhy ǵylymyn zerdeleý» atty ǵylymı-tájirıbelik konferentsııasynda Memleket tarıhy ınstıtýty dırektorynyń orynbasary Janna Qadyralına aıtty.

«Bizdiń aldymyzǵa Qazaqstannyń qazirgi zaman tarıhyn jazyp shyǵý mindeti qoıyldy - ıaǵnı bul elimiz táýelsizdik alǵannan bergi ýaqytty qamtıdy. Bul kezeń tarıh ǵylymynda endi ǵana zerttele bastady, táýelsizdik jyldarynda jetken jetistikterdiń barlyǵyn biz óz kózimizben kórip, ózimiz kýáger bolyp kelemiz», - dep atap ótti J.Qadyralına.

Onyń aıtýynsha, tarıhshylardyń basty mindeti osy úderisterdi taldap jazyp, jańa tendentsııalardy anyqtap, qoǵamymyzdyń damý joldaryn aıqyndaý. Sonymen qatar, ómirde oryn alyp jatqan ózgeristerdi tıimdi taldaý úshin ǵylymı bazany jetildirý qajet.

«Sonymen qatar, búgingi konferentsııaǵa qatysýshylar «Máńgilik El» ulttyq ıdeıasy kontekstinde Qazaqstan tarıhy ǵylymynyń osy kezdegi erekshelikteri men jetistikteri, ary qaraı damý joldary, oqytýdyń ınnovatsııalyq ádistemesin oqý úrdisine engizý, jańa býyn oqýlyqtaryn daıarlaý, aqparattyq tehnologııa jetistikterin keńinen paıdalaný sııaqty máselelerdi talqylaıdy», - deıdi J.Qadyralına.