Ǵalymdar qazaqsha ym-ısharany tanıtyn júıe oılap tapty

ASTANA. QazAqparat - Jasandy ıntellekt qazaqsha ym-ıshara tilin tanı alady. Otandyq ǵalymdar sóıleý jáne estý qabileti buzylǵan adamdarǵa arnalǵan biregeı júıeni oılap tapty, dep habarlaıdy QazAqparat Habar24.kz saıtyna silteme jasap.

Saıtta jarııalanǵan málimetterge qaraǵanda, jobanyń arqasynda qazaq tilindegi ym alfavıtin túzýge múmkindik týady. Ónertapqyshtar júıeni jetildirý úshin «Ǵylym qorynan» grant alýǵa múddeli.

Jasandy ıntellektke negizdelgen ǵylymı eńbektiń artyqshylyǵy – qazaqsha ymdaý tiline beıimdelýinde.

«Bul ym tilinde kórsetilgen sózderdi mátinge túrlendirip beredi. Ári qaraı sol mátindi biz sóılemge túrlendirýmen aınalysamyz. Eseptiń osy jaǵyn sheshken soń, biz ekinshi jaǵyn sheshýmen aınalystyq. Qazir 3D avatar jasaý barysyndamyz. Oqytylǵan modelderimizdi 3D avatarǵa engizý arqyly biz tabıǵı tildegi sózdi ym tiline generatsııalaımyz»,-deıdi L.Gýmılev atyndaǵy EUÝ jasandy ıntellekt tehnologııasy kafedrasynyń aǵa oqytýshysy Nurzada Amangeldi.

Onyń aıtýynsha, bul jobanyń teńdesi joq.

Nurzada Amangeldi álemdik reıtıngi joǵary jýrnaldarǵa 3 maqala jarııalap, onyń biregeıligin dáleldegen. Ónertapqysh erekshe qajettiligi bar adamdardyń memlekettik mekeme, bilim berý jáne medıtsına nysandarynda qysylmaı qyzmet alýyna jol ashylady dep otyr. Ol úshin jobany kommertsııalandyrý kerek. Endi ǵalym «Ǵylym qorynyń» grantyn alýdy kózdep otyr.

«Biz «Ǵylym qorynyń» konkýrsyna 4 ónim usyndyq. Alfavıtti oqytatyn trenajer, sózderdi oqytatyn trenajer, mobıldi qosymsha, sonymen qatar ymdy tanıtyn jáne generatsııalaıtyn júıe. Biz ár tilde 3 myń sózden qosaıyq dep otyrmyz, jalpy 9000 sóz. Sonymen qatar bizge 5 sýrdoperevodchık maman kerek. Neırondyq júıeniń kórsetkishin joǵarylatý úshin biz ártúrli adamdarmen 1 ymdy 100 ret jasaıyn dep otyrmyz. Sonda bizdiń 9000-90000 bolady. Sondaı bizde óte kólemdi jumys kútip tur»,-deıdi ǵalym.

Onyń aıtýynsha, júıe arqyly qazir tapshy sanalatyn sýrdoaýdarmashylardy daıyndaýǵa bolady. Munyń ózektiligin «Sańyraýlar qoǵamy» da moıyndady.

«Qazir elimizde sóıleý jáne estý qabileti buzylǵan 32 myń adam bar. Ókinishke qaraı, olardyń tolyqqandy bilim alyp, eńbek etýine múmkindik az. Al ýaqyt ótken saıyn jetildirile túsetin tyń neırondyq júıe bul olqylyqtyń ornyn toltyrýǵa sebep bolady, - deıdi mamandar.