Ǵalymdar qaterli isik dertiniń kóne zamanda da bolǵanyn anyqtady
ASTANA. QazAqparat - Ulybrıtanııalyq zertteýshiler qazirgi Sýdan eliniń aýmaǵynda budan úsh myń jyl buryn ómir súrgen jas adamnyń qańqasynan qaterli isiktiń nyshandaryn anyqtady, dep habarlady Bı-Bı-Sı portaly.
Qaterli isik negizinen qazirgi zamannyń derti dep sanalady. Ol temeki shekkennen, beı-bereket ómir súrgennen, qazirgi ýaqytqa tán ártúrli kúızelisterden paıda bolady degen pikir qalyptasqan. Sóıtse, ol kóne Mysyrda da bolǵan eken. Ǵalymdar qańqany zertteı kele, súıekterdiń keıbir jerleriniń zaqymdanǵanyn baıqaǵan. Keıinnen olardyń qaterli isiktiń bir túriniń damýy saldarynan paıda bolǵanyn anyqtady.
Bul tujyrym qaterli isik dertiniń myńdaǵan jyldar boıy qalaı damyp kelgenin anyqtaýǵa septigin tıgizeri sózsiz.
