Ǵalymdar: qart adamdardyń ǵalamtordy paıdalanýy depressııaǵa ushyraýynyń aldyn alady
ASTANA. QazAqparat - Ǵalymdar ǵalamtordy qandaı da bir deńgeıde paıdalaný egde jastaǵy adamdardyń depressııaǵa ushyraýynyń aldyn alýda kómektese alady, dep otyr.
Mundaı tujyrymdy Mıchıgandaǵy Telekomýnıkatsııa, aqparattyq zertteýler jáne BAQ memlekettik ýnıversıtetiniń zertteýshileri jetkizip otyr.
Olardyń aıtýynsha, jastary ulǵaıǵan 10 mıllıonnan astam amerıkandyqtar qazir depressııaǵa shaldyqqan. Qarttardyń kóp bóligi jalǵyzdyqtan zardap shegýde. Zertteý búkilálemdik jelini paıdalaný qart adamdardyń depressııaǵa ushyraý qaýpin 30 paıyzǵa deıin tómendete alatynyn kórsetti.
Internet ondaı jandarǵa jaqyn týystarymen jáne dostarymen aralasýǵa jáne jańa adamdarmen tanysýǵa kómektesedi. Bul ásirese, jalǵyz qalǵan adamdar úshin mańyzdy.
Sóıte tura, sarapshylar ǵalamtordy da shamamen qoldaný kerektigin, sonda ǵana onyń paıdasy zor bolatyndyǵyn jáne adam densaýlyǵyna keri áserin tıgizbeıtindigin eske salady, dep jazady sciteclibrary.ru.
