Ǵalymdar: Qan analızin saraptaý arqyly adamnyń sýıtsıdke beıimdiligi dárejesin anyqtaýǵa bolady
ASTANA. QazAqparat - Adamnyń jalpy qan analıziniń nátıjeleri arqyly onyń ózine-ózi qol jumsaýǵa qanshalyqty beıim ekenin anyqtaýǵa bolady. Mundaı qorytyndyny Amerıkanyń Baltımor qalasyndaǵy Djons Gopkıns atyndaǵy medıtsınalyq zertteýler ınstıtýtynyń mamandary jasaǵan.
Zertteý nátıjeleri "Vashıngton post" gazetinde jarııalandy.
«Biz adamnyń SKA2 geni mıdyń stresske jaýap qatýyn anyqtaıdy degen tujyrym jasadyq. Ózine-ózi qol jumsap qaza tapqandar men sýıtsıd jasaýǵa áreket etkenderdiń mılaryn zertteı otyryp, olarda SKA2 geniniń belsendiligi tómen ekenin ári mýtatsııaǵa ushyraǵanyn anyqtadyq. Onyń mýtatsııaǵa ushyraý deńgeıi neǵurlym joǵary bolsa, adamnyń óz ómirine óziniń qol suǵýy da soǵurlym joǵary bolady», - deıdi zertteý jetekshisi Zaharı Kamınskı. Zertteýge 325 amerıkandyq qatysqan. Onyń nátıjesi boıynsha ózine-ózi qol jumsaýǵa áreket etkender men bul týraly oılanǵandar 80 paıyzǵa deıin dál anyqtalǵan. Tipti, jastardyń arasynda bul kórsetkish 100%-ǵa deıin jetken. DDSU málimetinshe, jyl saıyn álemde 1,5 mln. jýyq adam ózine-ózi qol jumsap, ómirimen qosh aıtsady. Al 20 mln. jýyq adam osyndaı áreketke talpynady eken. Sýıtsıdter sany boıynsha birinshi oryndy Qytaı alady, munda jyl saıyn 300 myń adam óz erkimen ómirmen qoshtasady. Ekinshi orynda - Úndistan (160 myń adam), úshinshi orynda - AQSh (37 myń adam) tur, dep habarlaıdy ITAR-TASS.
