Ǵalymdar Gúljan Qaraqusovadan «Agroýnıversıtet» oqý-óndiristik sharýashylyǵyn maqsatty qarjylandyrýǵa qoldaý kórsetýin surady
ALMATY. 23 tamyz. QazAqparat /Erlik Erjanuly/ - «Agroýnıversıtet» oqý-óndiristik sharýashylyǵy tehnıkalyq jáne tehnologııalyq jańartýlardy qajet etedi.
Ony Qazaq ulttyq agrarlyq ýnıversıtetiniń oqytýshy ǵalymdary keshe QR Parlament Májilisiniń Qarjy jáne bıýdjet jónindegi komıtetiniń tóraıymy Gúljan Qaraǵusovamen bolǵan kezdesýde aıtty.
QR UǴA akademıgi, aýyl sharýashylyǵy ǵylymdarynyń doktory, professor Rahymjan Eleshov depýtattan oqý ornynyń QazUAÝ-dyń «Agroýnıversıtet» oqý-óndiristik sharýashylyǵyn maqsatty qarjylandyrý týraly úkimetke suraý joldap, qoldaý kórsetýin surady. «Almatyǵa jaqyn jerde ornalasqan bul sharýashylyqtarda bizdiń stýdentter tájirıbeden ótedi. Áıtse de olar kúrdeli tehnıkalyq jáne tehnollogııalyq jańartý jumystaryn qajet etedi. Bizdiń túlekter barlyq ozyq tehnıka men tehnologııalar qoldanylatyn údemeli ındýstrııalyq-ınnovatsııalyq damý baǵdarlamasyna qatysady», - deıdi Rahymjan Eleshuly. Al professor Ǵalıjan Mádıevtiń aıtýynsha, ındýstrııalyq-ınnovatsııalyq damý baǵdarlamasyn jandandyrý bilim, ǵylym jáne óndiristiń arasyndaǵy tikeleı yqpaldastyqqa baılanysty. Tabıǵat jáne resýrstyq áleýetti qoldaný deńgeıiniń tómendiginiń sebebi ekonomıkanyń damýyn retteıtin ekonomıkalyq saıasat pen quqyqtyq bazanyń jetimsizdiginde. Zańdar - ekonomıkalyq saıasatty júzege asyrýdyń quraly. Agrarlyq ǵalym-ekonomıster jáne quqyqtanýshylardyń ekonomıkalyq saıasatty, quqyqtyq bazany jetildirýde qabyldanatyn jańa zańdardyń saraptamasynda paıdasy zor.
