Ǵalymdar: Chernobyl apaty qaıtalanýy múmkin
ASTANA. QazAqparat - Bolashaqta Chernobyl AES-inde bolǵan sııaqty iri apat qaıtalanýy múmkin. Bul týraly 200-den astam ıadrolyq apattarǵa taldaý jasap shyqqan Sasseks ýnıversıtetiniń mamandar toby jarııa etti.
Ǵalymdar ózderiniń osy máselege qatysty boljamdaryn Risk Analysis jýrnalynda jarııalanǵan maqalada aıtqan, dep jazady lenta.ru.
Maqalada keltirilgen málimetter boıynsha, AQSh-ta 1979 jyly «Trı-Maıl-Aılend» AES-inde bolǵan apat 10-20 jyldan da jıirek bolýy kerek.
Ǵalymdar baıandamalar men ǵylymı maqalalardy, baspasóz-baıandary men basylym aqparattaryn zerttedi. Olar múlikten aıyrylý, saqtandyrý tólemderi, qorshaǵan ortany qalpyna keltirý sııaqty shyǵyndardy esepke ala kele árbir apattan keletin shyǵynnyń mólsherin anyqtaǵan.
Mamandardyń sózinshe, Halyqaralyq atom energııasy agenttiginiń apattardy boljaý maqsatynda qoldanatyn standartty ádisteri jetkiliksiz. Sondyqtan ıadrolyq reaktorlardy shyǵarý kezinde paıdalanatyn tehnologııalardy jetildirý kerek.
