Ǵalymdar bólme ósimdikteriniń paıdaly 5 túrin atady
ASTANA. QazAqparat - Bólme ósimdikteri aýany tazartyp qana qoımaı, aǵzany kúızelisten aryltady. Amerıka ǵalymdary arnaıy zertteý júrgizip, adam aǵzasyna oń áserin tıgizetin bólme ósimdikteriniń 5 túrin anyqtady.
Bul ósimdikterden allergııa sırek bolady eken, dep jazady sheteldik BAQ.
1. Aǵylshyn shyrmaýyǵy. Bul ósimdik aýany kómirqyshqyl gazdardan tazartýdan alǵashqy oryndarda tur. Aǵylshyn shyrmaýyǵy ásirese páterdiń tómengi qabattarynda turatyn nemese jertólede jumys jasaıtyn adamdarǵa óte paıdaly.
2. Bambýk palmasy. Aǵylshyn shyrmaýyǵy sý men kún kózin jaqsy kórse, bambýk palmasy oryn talǵamaıdy. Tipti ony jıi sýarýdyń da qajeti joq. Alaıda bul ósimdik aýany jaqsy tazalaıdy. Bambýk palmasyn kompıýterdiń aldyna qoısańyz da bolady, sebebi ol elektromagnıttik sáýlelenýdiń zııanyn azaıtady.
3. Spatıfıllým. Bul bólme ósimdigi úıińizdiń «qara jumysynan» eshqashan qoryqpaıdy. Ol ónerkásiptik jáne turmystyq toksındermen kúresedi. Kóp jaǵdaıda Spatıfıllým jańa úıge kóship kirgen kezde nemese jóndeý jumystaryn jasaǵannan keıin bólmede tursa, aýany túrli hımıkattardan aryltady.
4. Palma Ledı. Bul ósimdik tek aýany tazartyp qana qoımaı, sonymen birge ony qajetti mıneraldarmen, tuzdarmen baıytady. Adamnyń tynys alý júıesine oń áserin tıgizedi. Bundaı ósimdikti sozylmaly bronhıt, júrek aýrýymen aýyratyn adamdar bólmelerinde ustaǵan jón. Sonymen qatar Ledı júıkeni keremet tynyshtandyratyn qasıetke ıe. AQSh-ta bul bólme ósimdigin jumyskerler kóbinese kóp ashýǵa berilmes úshin ózderiniń basshylaryna satyp alyp beretin kórinedi.
5. Fıkýs. Bul bólme ósimdiginiń aýany tazartyp, jeldetetin qabileti bar. Sonymen qatar múlde allergııa týǵyzbaıdy. Sondyqtan da buny balalar bólmesine qoıýǵa ábden bolady. Ǵalymdardyń paıymynsha, bul gúlden bólinetin bıoaktıvti zattar jaqsy uqıyqtap, sergek turýǵa septigin tıgizedi.
