Ǵalymdar: Balyq pen teńiz ónimderin tamaqqa paıdalaný ómirdi uzartady
ASTANA. QazAqparat - Ettiń ornyna balyq pen teńiz ónimderin jegendi unatatyn adamdar qartaıǵan shaqta júrek talmalary men basqa da aýyr dertterge basqalardan góri 30 paıyz sırek shaldyǵady.
Budan basqa, olar ortasha eseppen alǵanda 2,2 jyl uzaq ómir súredi. Garvard ýnıversıtetiniń ǵalymdary osyndaı qorytyndyǵa kelip otyr.
Zertteý aıasynda bir top mamandar 65 jas jáne odan eresek amerıkandyqtardyń júrek jáne qan tamyrlaryna baılanysty densaýlyq jaǵdaıy týraly málimetterdi jınap, taldaǵan. Bul úshin 16 jyl ýaqyt qajet boldy. Joba barysynda eriktilerdiń qan qysymy ólshenip, qandary taldaýǵa alyndy. Onymen bir ýaqytta keıbir shtattardyń áleýmettik jáne medıtsınalyq qyzmetteri júrek aýrýlarynyń oqıǵalary men ólimge aparǵan sebepterdi tirkep otyrdy.
Ǵalymdar barlyq egde jastaǵy amerıkandyqtardy shartty túrde eki topqa - «qarapaıym amerıkandyqtar» jáne qan quramynda omega-3 maı qyshqyldarynyń joǵary deńgeıi bar «balyq jeýdi jaqsy kóretinder» dep bólgen. Olardyń aýrýlary men ómir uzaqtyǵynyń statıstıkasy «balyq jeýdi jaqsy kóretinderdiń» júrek-qan tamyry aýrýlaryna 30 paıyzǵa sırek shaldyqqanyn kórsetti. Budan basqa, olardyń ınsýlt, júrek talmasy jáne qan tamyrlarynyń kemistigi sırek tirkelgen, dep habarlaıdy Medikforum.
«Bul rette, balyqty únemi tamaqqa paıdalaný salaýatty emdámniń bir bóligi retinde tanylǵan. Egde jastaǵy adamdar qanynyń quramyndaǵy balyq maıy men ólim arasyndaǵy baılanysty eshkim de izdeýge tyrysqan joq. Bizdiń zertteýimizdiń qorytyndysy maı qyshqyldarynyń júrek-qantamyr júıesiniń saýlyǵy úshin óte mańyzdy ekenin jáne bul paıdanyń qartaıǵan jasqa taǵy birneshe jyl qosatynyn rastady», - deıdi ǵylymı jumystyń qorytyndylary týraly málimdegen onyń avtorlary.
