Ǵalymdar: Balyq maıy temekini tastaýǵa kómektesedi
ASTANA. QazAqparat - Quramynda Omega-3 qospasy bar taǵamdar temeki shegýshilerdi zııandy ádetten arylýǵa kómektesedi. Maıly qyshqyldardy tutyný nıkotınge degen áýestikti tómendetedi, deıdi ǵalymdar.
Bir aı boıy Omega-3 kapsýlasyn qabyldaǵan shylymqorlar temeki shegýdi 11 paıyzǵa azaıtqan.
Zertteýge jetekshilik etken Izraıldegi Haıfa Ýnıversıtetiniń ǵalymy, doktor Sharon Shenkar qazirgi ýaqyttaǵy paıdalanylyp júrgen temeki shegýden bas tartýǵa járdemdesetin zattar men preparattar asa tıimdi emestigin, olar keıin qolaısyz saldarǵa soqtyrýy múmkin ekenin atap ótti.
«Bizdiń zertteý nátıjesi Omega-3 arzan ári qaýipsiz taǵamdyq qospa ekenin anyqtady. Sonymen birge nıkotınge degen áýestikti eleýli tómendetedi», - dep málimdedi ǵalym.
