Ǵalymdar bala tárbıesinde ananyń sarqylmas tózimi qaıdan keletinin anyqtaýǵa tyrysty
ASTANA. QazAqparat - Balalarynyń ósip, jetilýi úshin ana qolynan kelgenniń bárin jasaýǵa ázir. Arızona (The University of Arizona) ýnıversıtetiniń zertteýshileri áıel adamǵa tán osy shydamdylyq pen balaǵa degen mahabbattyń qudiretti kúshi qaıdan keletinin izdep kórdi. Tájirıbelik zertteýge orta jáne joǵary bilimi bar 2000-nan astam ana qatysty, dep jazady «Prothom Alo».
Olardan eń bastysy ana mindetin atqarý úshin, sharshamaı, talmaı qyzmet etetin kúsh-jiger qaıdan darıtyny suraldy. Zertteý qorytyndysynda saýalnamaǵa jaýap bergen áıelderdiń negizgi oılary iriktelip, qorytyndy jasaý úshin basty nazarǵa alyndy. «Munda jeti faktordyń tórteýine basymdyq berildi: anasynyń balaǵa qatysty ne nárseni bolsyn shyn júregimen qabyldaýy, sabyr, qarym-qatynasta shynaıy bolýy, dos tuta bilýi boldy. Osy qasıettiń arqasynda analar ómirdiń kúrdeli kezeńinde sabyrlylyq saqtaı bilgen», delingen málimdemede. Zertteý avtorlary, sondaı-aq bala tárbıesinde erli-zaıyptylar arasyndaǵy ózara qatynasty mańyzdy dep esepteıdi. Alaıda, ǵalymdar ol áıeldiń balaǵa degen mahabbatyn aıqyndaýshy faktor emes deıdi. Degenmen, suralǵan áıelderdiń deni qoldaý men túsinistikpen qaraýǵa muqtaj bolǵanyn jetkizgen.
