Ǵalymdar: Azııa halqy Amerıkanyń bar ekenin Kolýmbtan buryn bilgen
ASTANA. QazAqparat - Azııa halqy Soltústik Amerıkanyń osy álemde bar ekendigin saıahatshy Hrıstofor Kolýmbtan buryn bilgeni týraly aıǵaqtar tabyldy, dep habarlady www.24.kz.
AQSh arheologtary Alıaskadan osy halyqtar arasynda saýda-sattyq baılanystardyń bolǵandyǵyn rastaıtyn jádigerlerdi tapty. Pardıý Ýnıversıtetiniń qyzmetkeri Korı Kýper bylaı deıdi: «Jalpy úndister men Azııa halqynyń arasynda baılanystyń bolǵanyna buryn da kózimiz jetken edi. Endi bul derekter naqtylana tústi. Azııa halqy Amerıka turǵyndaryna metall satqan. Sebebi biz tapqan metall quımalary Eýrazııada quıylyp, artynsha Sibir men Berıng buǵazy arqyly Alıaskaǵa jetkizilip otyrǵan».
Ǵalymdardyń tujyrymdaryn Alıaskada turǵan halyqtyń mekeninen tabylǵan jádigerler men eńbek quraldary rastaı tústi. Bul jerdiń halqy otyryqshy ómir saltyn ustanǵan. Buǵan olardyń qatqan muz arasynan tabylǵan kóptegen mádenı eskertkishteri men metall buıymdary dálel bolady.
Kýperdiń aıtýynsha, metaldan jasalǵan eńbek quraldary óte sırek jáne ilýde bir kezdesetin jádiger sanalady. Sebebi sonaý zamanda metall asa tapshy materıal bolǵandyqtan, turǵyndar odan jasalǵan zattardy urpaqtan urpaqqa mura etip qaldyryp, ábden tozyǵy jetkenshe paıdalanǵan.
