Ǵalymdar avtobýsta egde jastaǵy adamdarǵa oryn bermeýge keńes berdi
ASTANA. QazAqparat - Ulybrıtanııalyq ǵalymdar toby el estimegen erekshe zertteý maqalasyn jarııalady. Olar bul eńbekterinde qoǵamdyq kólikterde egde jastaǵy adamdarǵa oryn bermeýge keńes bergen, dep habarlaıdy RIA Novostıge siltememen massaget.kz.
British Medical Journal jýrnalynda jarııalanǵan maqalada ǵalymdar qart adamdardyń fızıkalyq belsendiligi men áleýmettik qamtamasyz etilýiniń baılanysy jaıly jazǵan.
Hırýrg-ortoped Skarteltt MakNellı men onyń áriptesteri qartaıýdyń basty sebebi fızıkalyq belsendiliktiń azdyǵy dep sanaıdy. Únemi jattyǵý jasaý arqyly qartaıýdyń aldyn alyp, shıraq júrýge jol ashýǵa bolady deıdi.
«Biz qartaıǵan shaqta demalýǵa keńes bermeı, belsendilikti arttyrýymyz qajet. Avtobýsta nemese poıyzda ketip bara jatqanda qart adamǵa oryn berýden buryn jaqsylap oılanyp alyńyz. Olar úshin turyp turý - jaqsy jattyǵý», - deıdi professor Mýır Greı.
«Kóptegen aýrý adamnyń jasyna emes, belsendiliginiń azaıýyna baılanysty. Kóbirek jattyqsaq - sol tıimdi is bolady», - deıdi Skarteltt MakNellı.
Onyń aıtýynsha, statsıonarda emdelip jatqan adamdardyń ózi serýendep qaıtýǵa nemese dálizde júrýge ýaqyt tabýy kerek. Skarteltt MakNellı men onyń áriptesteri qoǵamnyń egde jastaǵy adamdarǵa kóbirek belsendi ómir súrýi úshin múmkindik jasaýy kerektigin aıtady.
Iá, ǵalymdardyń jasaǵan tujyrymy durys-aq bolar. Biraq úlkenin syılaǵan, qazynaly qarııasyn qadirlegen qazaq halqy úshin bul bir ábes qylyq ekeni jasyryn emes.
