Ǵalymdar aýadan energııa óndirýdiń ádisin tapty
ASTANA. Tamyzdyń 27-si. QazAqparat - Zertteýshi Fernando Gelembek Amerıkanyń Hımııalyq qoǵamynyń 240-shy ulttyq jınalysynda jasaǵan baıandamasynda adamzattyń aýadan energııa óndire alatynyn jarııa etti. Mundaı ıdeıany kezinde ataqty ǵalym Nıkolaı Tesla da usynǵan bolatyn, ol da, elektr qýatyn atmosferadan alýǵa bolatynyn aıtqan edi, dep habarlaıdy RBK agenttigi.
Fernando Gelembektiń pikirinshe, ózi jetekshilik etetin bir top zertteýshiniń tájirıbeleri keler urpaqqa energııanyń balama kózin tartý etkeli otyr. Tájirıbeniń mánisi sol, Gelembek aýa joǵary ylǵaldy bolǵan kezde, ondaǵy sý bólshekteriniń kremnıı men alıýmınıı fosfatynyń mıkroskopııalyq bólshekterimen qarym-qatynasqa túsetinin baıqaǵan. Nátıjesinde kremnıı teris zarıadtalsa, alıýmınıı bólshekteri - oń zarıadqa ıe bolady. Tájirıbe, atmosferadaǵy sýdyń elektr zarıadyn jınaqtap, ony ózimen qarym-qatynasqa túsetin materıaldarǵa beretinin kórsetken.
«Naızaǵaıly bulttardaǵy zarıadtar da osyndaı mehanızm boıynsha túziledi. Krıstall muz ben suıyq sý bultta aerozoldyq fazada kezdesedi - soqtyǵysqan kezde olarda zarıadtar bólinedi. Odan keıin aýyrlaý bólshekter bulttyń tómengi jaǵyna shoǵyrlanady. Qalǵandary joǵary jaqta qalady. Zarıadtar bólinedi, odan keıin qýatty kerneý paıda bolady. Eger biz meteorologııalyq aýqymda qarastyrar bolsaq, onda árıne, atmosferada úlken energııa qýaty bar», - dep túsindirdi bul jańa ádisti Máskeý fızıka-tehnıkalyq ınstıtýtynyń dotsenti Aleksandr Rodın.
Fernando Gelembektiń paıymdaýynsha, keleshekte kún batareıasyna uqsas, biraq jumystyń jańa qaǵıdasyna negizdelgen energetıkalyq akkýmýlıatorlar jasaýǵa bolady.
