Ǵalymdar: áskerı adamdardyń áıelderi uıqysyzdyqqa jıi shaldyǵady
ASTANA. QazAqparat - Áskerı adamǵa jar bolý ońaı sharýa emes. Amerıkalyq ǵalymdardyń aıtýynsha, áskerı adamnyń áıeliniń tún uıqysy jıi qashyp, sol sebepti mazasy bolmaıdy eken. Osy máselege qatysty zertteý nátıjesi American Academy of Sleep Medicine saıtynda jaryq kórdi, dep jazady 24.kz.
Ǵylymı tájirıbege ofıtserlermen shańyraq qurǵan 1480 áıel qatysypty. Zertteý kezinde olardan kúızeliske qanshalyqty jıi ushyraıtyny, ómirge kóńiliniń tolatyny-tolmaıtyny, dárigerge qanshalyqty jıi kórinetini týraly saýaldar qoıyldy.
Aqyry jaýynger jubaılarynyń 54%-nyń únemi uıqysy qashyp, sonyń kesirinen kúni boıy mazasyz kúıde júretindikteri anyqtaldy. Al bul áıelderdiń 62%-ynyń apta ishinde qatty sharshap-shaldyǵatyn kezderi bolady eken.
Mamandardyń aıtýynsha,tek túrli soǵys qımyldary bolǵan aımaqtarda qyzmet etip kelgen áskerılerge ǵana emes, olardyń otbasy múshelerinen, birinshi kezekte jubaılarynyń hal-jaǵdaıyna basty nazar aýdarý kerek.
