Ǵalymdar asqazany temirdi de qorytyp jiberetin tirshilik ıesin anyqtady
ASTANA. QazAqparat - Ońtústik Koreıa ǵalymdary álemdegi as qorytý júıesi eń kúshti tirshilik ıesin anyqtady. Ol - tazqara bolyp shyqty, dep jazady planet-today.ru.
Tazqara (lat. Aegypius monachus) - óte iri qus: denesiniń uzyndyǵy 1 m, qos qanatynyń jalpy uzyndyǵy 2 m 20 sm-deı, túsi qara qońyr. Eki kóziniń aınalasy men moıny jalańash. Tazqara kóbinese taýly jerlerde tirshilik etedi, óleksemen qorektenedi. Keıde tiri haıýandarǵa da shabýyl jasaıdy, maldyń aldymen etin, odan keıin ishek-qarnyn jep, eń sońynda súıekterin biteý jutady. Tasbaqany da eki aıaǵymen ustap turyp, tumsyǵymen úńgip jeıdi. Bir jumyrtqa tabady.
Mamandardyń aıtýynsha, bul qustyń asqazany iri-iri súıekterdi ońaı qorytyp jiberedi. Ol ol ma, tipti asqazanyna túsken metaldar da qorytylyp ketedi eken.
Buǵan qosa tazqaranyń ımmýndyq júıesi de óte kúshti bolyp shyqty. Ol oba aýrýy juqqan, qutyrǵan jáne basqa da óte qaýipti juqpaly aýrýlarǵa shaldyqqan jyrtqyshtardyń etimen qorektene beredi eken.
Zertteý jobasynyń avtorlarynyń biri - genetık Chon Paktyń aıtýynsha, onyń asqazanynnyń munsha qýatty bolýyna asqazan sóliniń qyshqyldylyǵy óte joǵary deńgeıde bolýy basty sebep.
