Ǵalymdar Almatynyń tarıhy 1000 jyldan ary bastalady degen ortaq sheshimge keldi
ALMATY. 18 qarasha. QazAqparat /Erbol Azanbek/ - Toǵyz eldiń kórnekti tarıhshy-arheolog ǵalymdary «Eýrazııanyń ertedegi jáne orta ǵasyrdaǵy kenttenýi: Almaty qalasynyń paıda bolýy, damýy jáne jasy» atty ekikúndik halyqaralyq ǵylymı-tájrıbelik konferentsııa qorytyndysy boıynsha Almatynyń naqty jasyn anyqtady.
Bul týraly búgin Almatyda arnaıy ótken baspasóz máslıhatynda aıtyldy.
Ǵalymdardyń paıymdaýynsha, Almatynyń jasy myń jyldan asady. Budan bylaı onyń tarıhyn 1854 jyldan bastap, sholaq qaıyrýǵa negiz joq.
Esterińizge sala keteıik, ekikúndik sharaǵa Koreıa, Reseı, Japonııa, Belgııa, Qyrǵyzstan, Italııa, Avstrııa, Ózbekstan, Albanııa elderiniń orta ǵasyrlyq ýrbanıstıkamen aınalysyp júrgen tarıhshy ǵalymdary qatysyp, Almatynyń naqty jasyn anyqtaýǵa atsalysqan bolatyn. Pikirtalastar men 50-ge jýyq baıandama, arheologııalyq qazbalar men tarıhı jazbalardyń negizinde olar Almatynyń jasy myń jyldan asady degen ortaq uıǵarymǵa keldi.
«Almatynyń jasy týraly endigi jerde daýryǵýǵa negiz joq. Konferentsııa barysynda onyń 1000 jyldan astam ýaqyttan beri ómir súrip kelgendigine naqty dálelder aıtyldy. Arheologııalyq derekter Almatynyń tarıhynyń 8-9 ǵasyrlardan beri bolǵandyǵyn dáleldeıdi. Alaıda Qazaqstandyq arheologtar qalanyń jasyn belgileý úshin 10 ǵasyrǵa toqtaldy. Bolashaqta arheologııalyq zertteýler júrgizilse, qalanyń jasy tipti odan da ary bolýy múmkin», - deıdi reseılik ǵalym, akademık, Bashqurtstannyń Ǵylym akademııasynyń vıtse-perezıdenti Naıl Majıtov.
Al japonııalyq ǵalym Kazýı ıAmaýchıdiń aıtýynsha, Almatynyń tarıhyna qatysty jumystardy jalǵastyrý qajet. «Qalanyń naqty jasyn anyqtaý úshin jańa tehnologııalar men tásilderge júginý kerek. Óz tarapymnan buǵan qatysýǵa daıynmyn»,- deıdi japon ǵalymy.
