Ǵalymdar Almatynyń atmosferalyq modelin jasamaq

ALMATY. QazAqparat - Ǵalymdar Almatynyń lastanǵan aýasyn zertteý úshin shaǵyn atmosferalyq model jasamaq. Bul týraly PhD doktory, «Ǵaryshtyq zertteýler men tehnologııalar» AQ janyndaǵy «Ionosfera ınstıtýty» AQ atmfosfera fızıkasy sektorynyń meńgerýshisi Alekseı Andreev Tıan-Shan astronomııalyq ekspedıtsııasynda aıtty, dep habarlaıdy QazAqparat tilshisi.

«Bizdiń ınstıtýt birqatar ǵylymı joba usynbaq. Atap aıtqanda, qalanyń mıkroklımatyn zerttesek degen oı bar. Almaty turǵyndaryn lastanǵan aýa máselesi qatty alańdatady. Osy maqsatta biz atmosferalyq model jasaı alamyz. Bul fızıkalyq, kompıýterlik baǵdarlama. Ol jerge jaqyn aýa qabatyn modeldeımiz», - dedi Alekseı Andreev. 

Onyń aıtýynsha, jańǵa tehnologııa qala ómirin modeldeýge múmkindik beredi. Qaı stansa - qansha zııandy zat shyǵaratynyn, qaı aýdandarda qansha avtokólik zııandy zat bóletinin anyqtaýǵa bolady.

«Bul jumys arqyly  bolashaqta qalanyń qaı aýdandarynda qara tútin qalyptasatynyn aldyn ala anyqtaýǵa  bolady. Soǵan qaraı qala bıligi qaı aýdanda qurylys salýǵa bolatynyn sheshedi. Keıbir aýdandarda bıik ǵımarat salý qaladaǵy aýa aǵynyna keri áserin tıgizýi múmkin», - dedi ǵalym.

Zertteý jumysy  úshin baǵdarlamashy, fızık, meteorolog mamandardan turatyn jumys toby qurylady.

«Múmkin JES-ty bir shaqyrym qaladan jyljytýymyz kerek bolar. Sonda qalany  basqan qara tútin seıiledi dep esepteımiz. Ony model júzinde teksermesek, esh nátıje shyǵara almaımyz. Álemde barlyq qalalar osylaı salynady», - dedi ol.