Ǵalymdar almatylyq stýdentterge «Máńgilik el» ıdeıasy týraly dáris oqydy
ALMATY. QazAqparat - Almatydaǵy Qazaq ulttyq agrarlyq ýnıversıtetinde «N.Nazarbaev: dáýir, tulǵa, qoǵam» atty kóshpeli kórme jobasy aıasynda «Qazaqstan joly: «Máńgilik el» semınar-trenıngi ótti, dep habarlaıdy QazAqparat tilshisi.
Semınar atalǵan joǵary oqý oryndarymen qatar, Abaı atyndaǵy Qazaq ulttyq agrarlyq ýnıversıtetinde de uıymdastyryldy. Semınar-trenıng lektory QR Tuńǵysh prezıdenti - Elbasynyń kitaphanasy dırektorynyń orynbasary Botagóz Qaıypova 3 kún ishinde 1500 stýdentke dáris ótkizýdi josparlap otyrǵanyn aıtty.
«N.Nazarbaev: dáýir, tulǵa, qoǵam» atty kóshpeli kórme jobasy nátıjesinde Almaty qalasynyń iri bilim flagmany bolyp qalyptasyp kele jatqan Qazaq Ulttyq Agrarlyq ýnıversıteti men Qazaq Ulttyq pedagogıkalyq ýnıversıtetinde stýdentter úshin «Qazaqstan joly: «Máńgilik El» semınar-trenıngin ótkizip jatyrmyz. Dáris barysynda Otanyna janashyr jastardy tárbıeleý máselesine mán beriledi. Táýelsizdiktiń erteńi jastardyń qolynda. Semınar-trenıng barysynda jastarymyzdyń Qazaqstannyń búgingi jaǵdaıyna kóńili tolatynyn baıqadyq. Almatyda ótkizip jatqan aǵartýshylyq maqsattaǵy jobamyzdyń barysynda 1500 stýdentke dáris oqımyz dep josparlap otyrmyz. Almatyda 3 halyqaralyq ǵylymı-tájirıbelik konferentsııa, 5 dóńgelek ústel, ǵylymı-tájirıbelik semınar ótkizemiz», - dedi QR Tuńǵysh prezıdenti - Elbasynyń kitaphanasy dırektorynyń orynbasary Botagóz Qaıypova.
Atalǵan kitaphananyń jetekshi mamany, tarıh ǵylymdarynyń kandıdaty Saǵyntaı Berdaǵulova mundaı semınar-trenıngter 2015 jyldan beri Astanada ótkizilip kele jatqanyn aıtty.
«Bizdiń semınarlarǵa JOO-daǵy úzdik stýdentter qatysady. 2015 jyldan beri respýblıka boıynsha 8000 stýdent dáris tyńdady. Semınar 2 kún júredi. Eki kún ishinde stýdentter teorııalyq kýrstardy tyńdap, praktıkalyq sabaqtardy ótedi. Eki kúnniń nátıjesi boıynsha, olarǵa sertıfıkat beriledi. Bıyl, kitaphana tarıhynda alǵash ret iri kóshpeli semınar-trenıng ótkizip otyrmyz. Alǵash ret Almaty stýdentteri bizdiń semınarlardy tyńdaýǵa múmkindik aldy. Abaı atyndaǵy Qazaq ulttyq pedagogıkalyq ýnıversıtetiniń 57 stýdenti men agararlyq ýnıversıettiń 70-ten astam stýdenti sertıfıkattaryn aldy. Ol kýálik qaǵazy bolashaqta stýdenttiń jumysqa ornalasýyna kómekshi bolady», - deıdi Saǵyntaı Berdaǵulova.
Atalǵan joba aıasynda QazUAÝ-da «Rýhanı jańǵyrý: jastar kózqarasy» taqyrybynda halyqaralyq ǵylymı-tájirıbelik konferentsııa ótedi.
