Ǵalymdar aqsha banknoty quramynan qaterli isik týdyratyn zat tapty
ASTANA. 13 tamyz. QazAqparat - Ǵalymdar álemniń túrli elderiniń aqsha banknottarynan qaýipti zat - bısfenol A tapty, dep habarlaıdy Medıtsınalyq aqparat jelisi.
Mamandardyń aıtýynsha, bısfenol A kontsentraty shekti mólsherden asyp túsken jaǵdaıda kózdiń shyryshty qabaty, tynys alý joldary qabynyp, teri aýrýlary, tipti, qaterli isik paıda bolýy múmkin.
Zertteýshilerdiń habarlaýynsha, bısfenol A óndiriste, ásirese plastık shólmekter, sport jabdyqtary, elektr quraldarynyń óndirisinde jıi qoldanylady jáne ony paıdalaný tóńiregindegi máselelerdiń ózektiligi kún saıyn arta túsýde. Sol sebepti ǵalymdar biregeı tájirıbe jumysyn júrgizdi. Zertteý barysynda olar álemniń 21 valıýtasynyń 156 kýpıýrasyn tekserip, olardyń árqaısysynyń quramynan bısfenol A qaldyqtaryn tapqan. Ol aqshaǵa qolmen ustaý arqyly, ásirese quramynda bısfenol A bar kassa chegin ustaǵannan keıin juǵady, dep túsindirdi mamandar.
Ǵalymdardyń aıtýynsha, aıtylǵan jańalyqqa qaramastan, abyrjýdyń qajeti joq. Sebebi bısfenol A-nyń teri arqyly aǵzaǵa enýi múmkin emes. Degenmen, densaýlyqty kez kelgen qaterden saqtaý úshin jeke gıgıena tazalyǵyn ustanyp, únemi qol jýý kerektigin eske salady sarapshylar.
