Ǵalymdar agroónerkásip keshenin sýbsıdııalaýdyń jańa ádisin usynyp otyr
ASTANA. QazAqparat - Búginde egistik alqaptarynyń ónimdiligi tómendep barady. Sebebi jerdiń qunarlylyǵy azaıdy. Osyǵan baılanysty topyraqqa tyńaıtqyshtardy dáldep sebýdiń tehnologııasyn tezdetip qolǵa alý qajet. Ol úshin qazirgi kombaındarǵa qosymsha optsııalardy ornatsa da jetkilikti, dep habarlaıdy QazAqparat tilshisi.
Sáken Seıfýllın atyndaǵy Agrotehnıkalyq ýnıversıtettiń ǵalymdary egistik alqaptarynyń agrohımııalyq kartogrammasyn jasap, topyraqtyń qunarlylyǵyna qatysty kóptegen máselelerdi anyqtady. Mundaı bastama alǵash ret qolǵa alynyp otyr. Ǵalymdar árbir gektar jerdiń quramyn zerttep shyqty. Zertteýge sáıkes, eń úzdik degen sharýa qojalyqtaryna tıesili jerlerdiń ózi qunarsyz, ýaqyt ótken saıyn tozyp barady. Sonyń saldarynan astyqtyń túsimi de az, sapasy da tómen. «Buryn Qazaqstanda 35 mln gektar egistik alqaptary boldy. Qazir biz ony 24-25 mln-ǵa deıin qysqartyp, egin sharýashylyǵyn tıimdi basqarýǵa kóshtik. Qunarsyz jáne jaramsyz jerlerdi shyǵaryp tastadyq Ol da durys. Degenmen, astyq alqaptarynyń ónimdiligi kóp kóterilgen joq. Nege? Sebebi biz tyńaıtqyshtardy sebýdi qoıdyq», - deıdi ýnıversıtet basshysy Aqylbek Kúrishbaev.
Onyń aıtýynsha, búginde tyńaıtqyshtardy dáldep sebýdiń arqasynda astyq alqaptarynyń ónimdiligin eki esege arttyrýǵa bolady. Al jańa tehnologııalardy qazirgi tehnıkaǵa ornatsa da jetkilikti. «Ashyǵyn aıtý kerek, jańa tehnologııalarmen jabdyqtalǵan tehnıkanyń baǵasy arzan emes. Degenmen, ol qural-jabdyqtardy Reseı, Belarýs pen AQSh tehnıkasyna ornatýǵa bolady. Onymen arnaıy kompanııalar aınalysady. Máselen, qazirgi kombaınǵa qosymsha optsııalar ornatýǵa múmkindik bar. Sonyń arqasynda tehnıkanyń dáldigi artady. Alaıda bir másele bar. Búginde memleket tarapynan jalpy tehnıkany satyp alýǵa sýbsıdııa beriledi. Al qosymsha qural-jabdyqtardy ornatýǵa sýbsıdııa joq. Osyǵan baılanysty aýyl sharýashylyǵy mınıstrligi sýbsıdııanyń jańa túrin qolǵa alýy qajet dep oılaımyz. Sonda fermerler tutas bir tehnıkany almaı, qolda bar tehnıkany jetildire alady. Sóıtip, biraz aqshany da únemdeýge bolady», - dep atap kórsetti A.Kúrishbaev.
Aıta keteıik, búgin Sáken Seıfýllın atyndaǵy Agrotehnıkalyq ýnıversıtetinde Qazaqstan - Germanııa forýmy ótti. Negizgi taqyryp - «Aýyl sharýashylyǵy salasyndaǵy tsıfrlandyrý». Atalǵan forým alǵash ret uıymdastyrylyp otyr. Al oǵan jınalǵan ǵalymdar agroónerkásip salasyna jańa tehnologııalardy engizý máselesin keńinen talqylap, Germanııanyń tájirıbesin zerdelep shyqty.
