Ǵalymdar: 2050 jylǵa qaraı adamzattyń jartysy alystan kórmeıtin bolady
ASTANA. QazAqparat - Jańa Ońtústik Ýels Ýnıversıteti men Sıngapýr kózdi zertteý ınstıtýtynyń qyzmetkerleri kórý máselesine baılanysty zertteý jumys júrgizdi.
Zertteýshilerdiń aıtýynsha, 2050 jylǵa qaraı Jer shary turǵyndarynyń jartysy alystan kórmeıtin bolady. Al keıbireýleri kórý qabiletinen múldem aıyrylýy múmkin.
Ǵalymdar tájirıbege 2 mln-ǵa jýyq adamdy tartty. Olardyń kórý qabiletteri boıynsha derekter 1995 - 2010 jyldar aralyǵynda jınaldy.
Mamandardyń sózine qaraǵanda, 2000 jyly Jer turǵyndarynyń 22,9% alystan kórmeý aýrýynan zardap shekti. Bul shamamen 1,4 mlrd adam.
Al 34 jyldan keıin, 2050 jyly turǵyndardyń 49,8% (4,758 mlrd adam) bul máselege tap bolýy múmkin. Olardyń shamamen mıllıardynda jaǵdaı aýyr bolmaq.
Ǵalymdar tehnologııalar men ýrbanızatsııa alystan kórmeıtinderdiń qataryn arttyratynyn eske saldy. Degenmen, óz densaýlyǵyn baqylap, kúnine shamamen 2 saǵat dalada taza aýa jutyp gadjetten aýlaq júrse mıopııanyń (alystan kórmeý) damýyn báseńdetýi múmkin.
