Ǵalymdar 15 jylǵy zertteýden keıin uıqyǵa kesh jatýdyń adam úshin taǵy bir zııanyn anyqtady
ASTANA. QazAqparat - AQSh ǵalymdary adamnyń uıqysy men densaýlyǵyn tikeleı baılanystyryp birneshe ǵylymı tujyrym usynǵan. Bul joly, uıyqtar mezgildiń artyq salmaqqa áseri týraly jańa zertteý jumystaryn jarııa etti. Zertteýshilerdiń aıtýynsha, kesh jatatyn adamdar erte uıqyǵa ketetinderge qaraǵanda artyq salmaqty tez jınaıdy, dep jazady meddaily.ru.
Kalıfornııa ýnıversıtetiniń ǵalymdary uıqy rejımin durys saqtamaıtyn adamdar bes jyldyń ishinde aıtarlyqtaı semiretinin aıtyp otyr.
Berkeley saıtynyń jazýynsha, kesh jatýǵa daǵdylanǵan adamdar sportpen belsendi túrde shuǵyldansa da, aǵzadaǵy zat almasýdyń ózgeristerine baılanysty semirý dertinen qutyla almaıtyn kórinedi.
«Biz jasaǵan qorytyndylar, dárigerler men ata-analarǵa jas urpaqtyń uıqyǵa jumsaıtyn jalpy ýaqytyn ǵana emes, uıqy mezgiline de nazar aýdarýy tıis ekenin kórsetti», - dep málimdedi zertteý jumysynyń jetekshisi Loren Asarnoý.
Demek, balanyń 12 saǵat «mezgilsiz» uıyqtaǵanynan góri erterek jatyp erterek uıqysyn qandyrýy birinshi kezektegi máselege aınalyp otyr, deıdi mamandar.
Ǵalymdar osyndaı qorytyndyny 1994-2009 jyldar aralyǵynda ótkizilgen jasóspirimderdiń densaýlyǵyn zertteý ulttyq baǵdarlamasy aıasynda 3,3 myń jasóspirim men eresekti zerttegen soń jasaǵan. Jumystyń avtorlary zertteýge qatysqan adamdardyń uıqy rejımindegi ózgeristerimen birge salmaǵynyń ózgerýin de baqylaýǵa alǵan.
