Ǵalym Shoıkın: QHA-nyń jańa ımıdjin qalyptastyrý kerek

ALMATY. QazAqparat - Elimizde 950-den astam etnomádenı birlestik jumys isteıdi. Bul týraly «Qoǵamdyq kelisimdi nyǵaıtýdaǵy etnomádenı birlestikterdiń róli» respýblıkalyq semınar barysynda Aqparat jáne qoǵamdyq damý mınıstrliginiń Etnosaralyq qatynastardy damytý komıtetiniń tóraǵasy Ǵalym Shoıkın aıtty, dep habarlaıdy QazAqparat tilshisi.

Onyń aıtýynsha, táýelsizdiktiń otyz jyldyq tarıhynda el irgesin bútindeýge atsalysqan Qazaqstan halqy Assambleıasynyń orny erekshe. Osy jyldary elimizde turatyn qanshama ult pen ulys tatýlyqty tuǵyr etip, mádenıeti men ónerin damytýǵa múmkindik aldy. Osy arqyly búgin ulty basqa biraq tilegi jáne júregi bir bizdiń yntymaǵymyz arta túsýde. Sondyqtan barshamyzdyń maqsatymyz el birligi men tatýlyǵyn saqtaı otyryp, jasampazdyǵymyzdy damytý.

«Biz bir otbasynyń músheleri sııaqty ekenimizdi umytpaýǵa tıispiz. Elbasy Nursultan Nazarbaev Assambleıa sessııasynda sóılegen sózinde bes prıntsıpke nazar aýdarǵan bolatyn. Olardyń qatarynda qazaqstandyq ulttar senimine negizdelgen partıotızmdi, azamattyq teńquqylyq prıntsıpin, memlekettik tildiń qoǵamda nyǵaıýyn damytý syndy mańyzdy máseleler bar. Osy oraıda Assambleıa bul prıntsıpterdiń is júzinde kórinis tabýyna eleýli úles qosatyn ınstıtýttyń biri ekenin atap ótken jón. Jumysymyzdy osy prıntsıpterdi basshylyqqa alyp uıymdastyrýǵa tıispiz», - deıdi Ǵalym Shoıkın.

Onyń aıtýynsha, etnomádenı birlestikter aýqymdy qoǵamdyq sharalarǵa atsalysady. Sonyń ishinde jastarmen tyǵyz baılanysty jumys isteıdi.

Etnobirlestikterdiń taǵy bir mańyzdy jumysy qaıyrymdylyq pen volonterlik sharalarǵa belsendi qatysý. Ásirese pandemııa kezinde olar bul iske eleýli úles qosty. Bul baǵytttaǵy jumysty jalǵastyrý kózdelgen.

«Búginde mańyzdy máselelerdiń biri Assambleıa men etnomádenı birlestikterdiń jumysyn keńinen nasıhattaý, qoǵamdyq kelisimdi nyǵaıtý maqsatynda atqaralyp jatqan sharalar men tatýlyqty, yntymaqty nyǵaıtýdyń, mememlekettik tildiń mańyzyn nasıhattaýǵa arnalǵan jumystar el nazarynda bolýy tıis. Ásirese áleýmettik jelide. Qazirgi kúni elimizde 950-den astam etnomádenı birlestik jumys isteıdi. Otyzǵa jýyǵy respýblıkalyq mártebege ıe. Eger árqaısysy atqarylyp jatqan qyrýar jumysyn kórsetse, qoǵamda assambleıanyń jańa ımıdjin qalyptastyra alady», - dedi ol.