Ǵalym, professor Dáýlet Tynyshbaev 80 jasta
ALMATY. 10 aqpan. QazAqparat /Erbol Turymbetov/ - Búgin Almatydaǵy Qazaq-Brıtan tehnıkalyq ýnıversıtetinde ǵalym, professor Dáýlet Tynyshbaevtyń 80 jasqa tolýyna oraı keńeıtilgen májilis ótti.
Dáýlet Muhamedjanuly 1964 jyly I.M.Gýbkın atyndaǵy Máskeý munaı-hımııa jáne gaz ónerkásibi ınstıtýtynda «Munaı jáne gaz kenishterin ıgerý» mamandyǵy boıynsha kandıdattyq dıssertatsııasyn tabysty qorǵap shyǵady. Sol jyly Ýfa munaı ǵylymı-zertteý ınstıtýtynyń qoınaýdaǵy munaı jáne gaz zerthanasynyń jetekshisi bolyp taǵaıyndalady. Osy jerde 18 jyl turaqty eńbek etip, ǵylymı jumystaryn odan ári jalǵastyrady.
1983 jyly Dáýlet Muhamedjanulynyń bastamasymen qoınaý jáne qoınaýdaǵy gaz ispetti suıyq magma quramdarynyń kollektorlyq qasıetterin zertteý boıynsha ǵylymı-zertteý bólimi ashylyp, osy bólimge jetekshilikke jiberiledi. 2001 jylǵa deıin taǵy da 18 jyl quramynda 6 tájirıbelik zerthanasy bar bul bólimge de jetekshilik etedi. Bul jerde oryndalǵan zertteý jumystarynyń nátıjeleri izdeý jáne barlaý geologııasy, geologııa kásipshiligi, munaı jáne gaz óndirý men daıyndaý, kenishterdi ıgerýdi jobalaý men saraptaý sııaqty ǵylymı-zertteý jumystaryn oryndaý úshin tıimdi paıdalanylady.
Ǵylymı jumyspen de qatar aınalysqan Dáýlet Muhamedjanuly «Qoınaýdaǵy munaıdy zertteýdiń jáne munaı kenishterin ıgerý úderisinde sapalyq ózgeristerdi boljaýdyń ǵylymı-ádistemelik negizderi» degen taqyrypta doktorlyq dıssertatsııasyn da tabysty qorǵap shyǵady.
15 jyl boıy KSRO Munaı mınıstrliginiń munaı men gazdy zertteý máseleleri boıynsha ádistemelik keńesiniń múshesi bolyp saılanǵan. 35 jyl boıy ózi bitirgen ınstıtýttaǵy ǵylymı keńes pen dıssertatsııalyq ádistemelik keńestiń, al 1998 jyldan doktorlyq qorǵaý boıynsha dıssertatsııalyq keńestiń múshesi. Onyń ǵylymı-óndiristik qyzmeti medaldarmen, «Bashqurtstan Respýblıkasynyń qurmetti ǵylym jáne tehnıka qaıratkeri (1985)» ataǵymen atap ótilgen, birneshe ret KSRO Munaı ónerkásibi mınıstrliginiń gramotalarymen marapattaldy.
Ol - 150-den asa ǵylymı eńbekter men avtorlyq kýálikterdiń ıesi. Sondaı-aq QBTÝ men QazUTÝ-dyń doktorlyq qorǵaý boıynsha birlesken dıssertatsııalyq keńesiniń de múshesi bolyp saılanǵan. Qazirgi kezde D.M.Tynyshbaev (Sheıh-Álı) QBTÝ-dyń munaı-gaz ınjenerııasy kafedrasynyń professory. Sonymen birge, munaı-gaz salasyndaǵy matematıkalyq zertteýler ǵylymı-zertteý zerthanasy jetekshisiniń orynbasary qyzmetin atqaryp keledi.
Keńeıtilgen májiliste ǵalymnyń ómirlik eńbek jolyna qatysty baıandama jasalyp, beınekórinister qoıyldy. Sonymen qatar, QBTÝ rektorynyń quttyqtaý haty oqylyp, mereıtoı ıesin eńbek ujymy men basqa da kafedra ókilderi quttyqtady.
