Ǵalym Namazaly Omashulynyń 70 jasqa tolýyna oraı elordada ǵylymı konferentsııa ótti

NUR-SULTAN. QazAqparat – L.Gýmılev atyndaǵy EUÝ-de kórnekti ǵalym Namazaly Omashulynyń 70 jyldyq mereıtoıyna arnalǵan «Elimizdiń medıakeńistigi: izdenister men jobalar» atty halyqaralyq ǵylymı-tájirıbelik konferentsııa bolyp ótti, dep habarlaıdy QazAqparat tilshisi ýnıversıtettiń resmı saıtyna silteme jasap.

Qazaqstannyń eńbek sińirgen qaıratkeri, ǵylym doktory, Jýrnalıstıka máselelerin zertteý ınstıtýtynyń dırektory, halyqaralyq ORBICOM uıymynyń múshesi, UNESCO professory, teoretık ǵalym, pýblıtsıst Namazaly Omashulynyń 70 jasqa tolý qurmetine oraı uıymdastyrylǵan konferentsııaǵa QR Aqparat jáne qoǵamdyq damý mınıstri Dáýren Abaev, QR Prezıdentiniń keńesshisi Baýyrjan Omarov, QR Prezıdentiniń baspasóz hatshysy Berik Ýálı qatysty.

QR Aqparat jáne qoǵamdyq damý mınıstrligi resmı qoldaý bildirgen konferentsııa aıasynda Memlekettik hatshy Qyrymbek Kósherbaev, Qazaqstan Respýblıkasy Prezıdentiniń Qazaqstan Respýblıkasy Parlamentindegi Ókildiginiń basshysy Beıbit Isabaev, QR Parlamenti Májilisiniń tóraǵasy Nurlan Nyǵmatýlın, QR Bilim jáne ǵylym mınıstri Ashat Aımaǵambetov, Qazaqstan Jazýshylar odaǵynyń basqarma tóraǵasy Ulyqbek Esdáýlet, «Habar» agenttigi AQ basqarma tóraǵasy Erlan Bekqojın jáne ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov, Abaı atyndaǵy Qazaq ulttyq pedagogıkalyq ýnıversıtetiniń rektory Tahır Balyqbaev, taǵy basqa da tileýles jandardyń ystyq lebizge toly quttyqtaýlary oqyldy. Aqyndar Nesipbek Aıtuly men Baýyrjan Jaqyp jyrdan shashý shashsa, QazUÝ jýrnalıstıka fakýltetiniń dekany Saǵatbek Medeýbekov pen EUÝ jýrnalıstıka jáne saıasattaný fakýltetiniń dekany Qaırat Saq shákirtteri men ujymdary atynan estelik syılyqtaryn tapsyrdy.

Sondaı-aq aqyn Júrsin Erman «Biregeı (tulǵataný oraıynda)», J.Balasaǵun atyndaǵy Qyrǵyz ulttyq ýnıversıtetiniń professory (Qyrǵyzstan) Ábiǵany Halılov «Qazaq jáne qyrǵyz jýrnalıstıka ǵylymynyń jetekshisi», Halyqaralyq aqparattyq-tehnologııalar ýnıversıtetiniń professory Aıazbı Beısenqulov «Jýrnalıstıka ǵylymynyń mektebi jáne N.Omashuly eńbegi», fılologııa ǵylymdarynyń doktory, professor Tursyn Jurtbaı «Aqyly men qaıratyn qatar ustap», L.N.Gýmılev atyndaǵy Eýrazııa ulttyq ýnıversıteti qazaq ádebıeti kafedrasynyń meńgerýshisi, fılologııa ǵylymdarynyń doktory, professor Rahymjan Turysbek «Berik ustanym men tereń parasat» taqyrybynda arnaıy baıandama jasady. Mereıtoı ıesine arnalǵan shara aıasynda «Professor N. Omashuly» derekti fılmi kórsetilip, ǵalymǵa arnalǵan kitaptyń («Ónegeli ómir» serııasy aıasynda jaryq kórgen) tusaýskeseri ótkizildi. Sonymen birge ýnıversıtettiń «Kúltegin» atrıýmynda mereıtoı ıesi eńbekteriniń arnaıy kórmesi uıymdastyryldy.

Jıynǵa qatysýshylar tús aýa «Qazirgi qazaq jýrnalıstıkasy jáne zamanaýı úrdister», «Qazaqstan medıakeńistigindegi zamanaýı baǵdarlar» jáne «Otandyq jýrnalıstıka: jańa qaǵıdattar men ólshemder» taqyryby boıynsha úsh sektsııaǵa bólinip, konferentsııa jumysyn odan ári jalǵastyrdy.