Ǵalym M. Joldasbekovtiń kórmesi ashyldy
ASTANA. 23 mamyr. QazAqparat - Búgin Astanadaǵy QR Ulttyq muraǵatynda kórnekti qoǵam jáne memleket qaıratkeri Myrzataı Joldasbekovtiń 75 jyldyq mereıtoıyna arnalǵan «Tulǵa taǵylymy» atty qujattyq kórme ashyldy.
«Myrzataı Jodasbekov táýelsiz Qazaqstannyń qalyptasýyna baǵa jetpes úles qosty. Ol bizdiń el úshin alǵashqy, qıyn jyldarda respýblıkanyń barlyq rýhanı jáne mádenı ómirin basqardy», - deıdi QazAqparat tilshisine bergen suhbatynda muraǵat dırektory Marat Ábsemetov.
«M. Joldasbekov eldiń sózin ustaıtyn nar tulǵaly memleketshil tulǵa, onyń otandyq saıasatqa, ǵylymǵa, mádenıetke jáne bilim berý isine sińirgen eńbegi ushan-teńiz. Sondyqtan biz ol kisiniń mereıtoıyna oraı atalmysh kórmeni ótkizýdi sheshtik», - deıdi ol.
Kórmege ǵalymnyń 100-ge tarta qujatynyń túpnusqalary jáne jeke qundy zattardy qoıylǵan.
M.Joldasbekov - áıgili túrkolog, kóptegen irgeli monografııalardyń avtory, jazýshy, QR ishki jáne syrtqy saıasatyn qalyptastyrýǵa ter tókken dıplomat, memleketshil tulǵa. Ol birqatar ýnıversıtetterdiń qurmetti professory, QR Tótenshe jáne Ókiletti Elshisi dıplomatııalyq dárejesine ıe, kórnekti qoǵam jáne memleket qaıratkeri.
Onyń «Ejelgi ádebıet nusqalary», «Kúltegin», «Asyl arnalar», «Asyl sózdiń atasy», «El taǵdyry - er taǵdyry» shyǵarmalary keńinen tanymal. Qytaı, Túrkııa, Iranda jarııalanǵan negizdemelik ǵylymı-zertteý eńbekteri aldyńǵy qatarly elderdiń iri zertteý ortalyqtary tarapynan zor qoldaýǵa ıe bolyp, álemdik mádenıettiń qundylyǵyna aınaldy.
