Ǵalym koronavırýsqa qarsy ımmýnıtetti qalaı kóterý kerektigin túsindirdi
NUR-SULTAN. QazAqparat – Astana medıtsına ýnıversıteti profılaktıkalyq medıtsına jáne nýtrıtsıologııa kafedrasynyń dotsenti Roza Súleımenova koronavırýs ınfektsııasyna qarsy ımmýnıtetti kóterý úshin qandaı sharalar qabyldaý kerektigin túsindirdi, dep habarlaıdy QazAqparat tilshisi.
«Immýnıtetti kóterý taqyrybyna toqtalsaq, aqýyzy kóp taǵamdarǵa mán berý kerek. Olarǵa taýyq, jylqy eti men balyq jatady. Osylardyń sorpasynyń quramynda aqýyzdar kóp. Sol sebepti bul taǵamdardy mindetti túrde eskergen mańyzdy», - R. Súleımenova.
Sonymen qatar ol túrli jańǵaqtardy alý kerektigin atap ótti.
«Immýnıtetti kóterý úshin 30-40 paıyzyn aqýyzdan qurasaq, endi qalǵan 50-60 paıyzyn kókónister men jemis-jıdekter arqyly qamtyǵan durys bolady. Jaz aılarynda alma, almurt, banan, qulpynaı, qaraqat, tańqýraı, ıtmuryndy kóbirek alǵan jón. Bular tabıǵı ónim bolǵandyqtan, S vıtamıniniń kózi», - dedi ol.
Onyń atap ótýinshe, adamnyń kóńil-kúıi ımmýnıtetti kóterýge erekshe áser etedi.
«Eger kóńil-kúıimiz jaqsy bolyp, jigerlenip júrsek, ımmýnıtet te jaqsy kóteriledi. Sary ýaıymǵa salynyp júrse, ımmýnıtet te álsireıdi. Sondyqtan únemi pozıtıvti bolý kerek», - dep túsindirdi epıdemıolog.
Munymen qosa ol profılaktıkalyq sharalarǵa toqtaldy.
«Kóbine dúken men dárihanaǵa baramyz. Bul nysandardyń kassalarynda keı jaǵdaıda kezek bolyp jatady. Osy oraıda ara qashyqtyqty saqtaýǵa mán bergen durys. Úıden shyqqanda medıtsınalyq maskany taǵyp, arnaıy qolǵap kıip, qolǵa antıseptık alý qajet. Úıge kirgen boıda qolymyzdy sabynmen jýamyz. Bólmeni kúnine kemine 3-4 ret jeldetken abzal, sondaı-aq ylǵaldy tazalyq sharalaryn júrgizýge kerek», - dedi Roza Sýleımenova.
