Ǵalym kıik etin óńdeıtin arnaıy kombınat salýdy usyndy

ASTANA. QazAqparat – Bıologııa ǵylymdarynyń doktory, «Astana» halyqaralyq ýnıversıtetiniń professory Murat Nuryshev kıik etin óńdeıtin arnaıy kombınat salýdy usyndy, dep habarlaıdy QazAqparat tilshisi.

«Et kombınatyn ashpaı turyp kıikten qandaı ónim alatynymyzdy naqty túsinip alýymyz kerek. Múıizinen bastap tuıaǵyna deıin óńdelýi kerek. Ol úshin mamandandyrylǵan et kombınattary bolý qajet. Óıtkeni olardyń aýrýy basqa, aýylsharýashylyǵy janýarlarynyń aýrýy basqa. Sondyqtan bizde mamandandyrylǵan jeli, qaıta óńdeýdiń ózgeshe júıesi bolýy kerek», - dedi ǵalym.

Onyń sózinshe, álemde kıik etine degen suranys joǵary.

«Kıik etiniń 100 gramy shamamen 100 dollar bolýy kerek. Shetelderde kıik etin satyp alǵysy keletinder kóp. Óıtkeni ol óte paıdaly. Kıikter jolyqqan shóptiń 50 túrinen bireýin ǵana tańdap jeıdi. Al jylqy segiz shóptiń birin jeıdi. Osyndaı talǵampazdyǵynyń arqasynda mamonttar men júndi múıiztumsyqtar dáýirinen beri aman kele jatyr. Biz kıikterdi tereńdetip zerttesek, elimizden birneshe Nobel syılyǵynyń laýreaty shyǵýy múmkin», - deıdi Murat Nuryshev.