Ǵalym Q. Bısenovtiń «Syndarly kezeń: senim men paryz» kitaby jaryq kórdi

Aıta ketý kerek, Q.Bısenov 2007 jyly Qazaqstan Respýblıkasy Parlamenti Májilisiniń tórtinshi shaqyrylymyna depýtat bolyp saılandy. Jýyrda ǵana ol Qorqyt Ata atyndaǵy Qyzylorda memlekettik ýnıversıtetiniń rektory bolyp taǵaıyndaldy.

Avtordyń jańa jınaǵyna maqalalary men suhbattary, Parlament minberinen jarııa etken depýtattyq saýaldary engen.

Maqala men suhbattarda Qazaqstannyń syrtqy saıasattaǵy kózqarasy men bedeli, elimizdiń EQYU-ǵa tóraǵalyq etýdegi atqarǵan izgi qyzmeti, álemdik qoǵamdastyqtaǵy memleketimizdiń róli jan-jaqty kórinis tapqan.

Ǵalym ózi aınalysyp kele jatqan tehnıka ǵylymdarynyń jańalyqtary men jetistigin HHІ ǵasyrda ómirge engizýdiń mańyzdylyǵyna aıryqsha toqtalady. Kelesi bir maqalasynda táýelsiz Qazaqstannyń ǵylym men bilim salasyndaǵy qol jetkizgen tabystary men aldaǵy kókjıekteri jaıly jan-jaqty baıandaǵan.

Osy kitaptan Qazaqstandaǵy barlyq deńgeıdegi bilim berý júıesiniń jańa reformalary, elimizdiń oqý-tárbıe salasyn halyqaralyq bilim deńgeıimen teńestirýdiń joldary, joǵarǵy oqý oryndarynda bilim alýdyń jańa baǵyttarynyń oń ózgeristeri, «Ǵylym týraly» zańnyń jańa qaǵıdattary týraly mol maǵlumat alýǵa bolady.

Qazaqstan Prezıdenti Nursultan Nazarbaevtyń bastamasymen ómirge kelgen túbi bir túrki tildes elderdiń basyn qosyp otyrǵan Túrk PA-nyń az jyldyń ishindegi jetistikteri de qamtylǵan.

Eńseli elordamyzdyń álemdegi aıshyqty qalalardyń birine aınalǵanyn ǵalym sáýlet óneriniń damý dástúrine baǵa bere otyryp ashady.

«Jınaqqa engen materıaldarǵa nazar salǵan oqyrman kóńiline qonymdy oı, paıymdy pikir tapsa, meniń de oılaǵan maqsatymnyń oryndalǵany»,- deıdi kitap avtory.

Qazaqstan táýelsizdiginiń 20 jyldyǵy qarsańynda jaryqqa shyǵyp otyrǵan bul kitaptyń oqyrman qaýymǵa, ǵylym men bilim jolynda júrgen jastarǵa berer taǵylymy mol bolmaq.