Ǵalym dári-dármektiń qymbatshylyǵyn bir mysalmen dáleldep berdi
ASTANA. QazAqparat - Dúnıejúzi densaýlyq saqtaý uıymy atqarý komıtetiniń múshesi, professor Maqsut Quljanovtyń aıtýynsha, sońǵy eki jyldyń ishinde Qazaqstanda AITV-ǵa qarsy dári-dármektiń baǵasy tómendese de, kórshi Ózbekstannan tórt ese qymbat bolyp tur, dep xabarlaıdy QazAqparat tilshisi.
«Bir mysal keltireıin, juqtyrylǵan ımmýn tapshylyǵy sındromyna qarsy dári-dármektiń baǵasy kórshi eldermen salystyrǵanda on ese qymbat bolǵan. Qazaqstanda eki jyl buryn AITV (adamnyń ımmýn tapshylyǵy vırýsy - avt.) shaldyqqan bir adamdy emdeýge 2 500 myń AQSh dollary jumsaldy. Sol kezde Ózbekstanda - 250 dollar, al Malaızııada 180 dollar boldy. Iá, sońǵy eki jyldyń ishinde bizdegi baǵa 800 dollarǵa tómendedi. Degenmen, sonyń ózi kórshi eldermen salystyrǵanda úsh-tórt ese qymbat bolyp tur», - dedi professor Quljanov búgin Astanadaǵy dári-dármekterdi tıimdi paıdalaný máselelerine arnalǵan xalyqaralyq konferentsııada.
Ǵalymnyń aıtýynsha, dári-dármekterdiń baǵasyn tómendetýdiń arqasynda emdeý sharalarymen naýqastardy kóptep qamtýǵa bolady. Máselen, buryn AITV shaldyqqan bir adamǵa 2500 dollar jumsalsa, qazir týra osy aqshaǵa úsh adamdy emdeýge múmkindik bar.
«Negizi, damýshy memleketterde dári-dármekterdiń qymbatshylyǵy anyq baıqalady. Tipti, damyǵan memleketterge qaraǵanda qymbat bolyp tur. Al sapasy syn kótermeıdi. Ondaı baǵalar ekonomıkaǵa da, xalyqtyń ál-aýqatyna da sáıkes kelmeıdi. Oǵan qosa, jalǵan dári-dármekter az emes», - dep atap kórsetti Quljanov.
