Ǵalym: Adamdar 120 jyl ómir súretin bolady
ASTANA. QazAqparat - Reseı Memlekettik dýmasynyń Ǵylym jáne ǵylymı tehnologııalar komıtetiniń basshysy, Reseı ǵylym akademııasynyń akademıgi Valerıı Chereshnev jaqyn bolashaqta adamdardyń ómir súrý jasy uzarady, degen tujyrymǵa keldi.
Onyń aıtýynsha, endi adamdar orta eseppen 90 jasqa deıin ómir súretin bolady. Al 2050 jylǵa qaraı ol tipti 110-120 jasqa deıin jetýi múmkin. Maman bul týraly gerontologııa (adamnyń jáne janýarlardyń aǵzasynyń qartaıý zańdylyqtaryn zertteıtin ǵylym) máselelerine arnalǵan dóńgelek ústel kezinde málim etti¸dep jazady «Rossııskaıa gazeta».
Sondaı-aq Chereshnev áńgimeniń Japonııa, AQSh, Kanada syndy damyǵan elder men eýropalyq memleketterge qatysty bolyp otyrǵanyn naqtylady. Alaıda, bul boljamnyń oryndalýy úshin de densaýlyq saqtaý salasynyń qyzmeti jetildirilip, adamdardyń bıologııalyq erekshelikteri burynǵy qalpynda damýy tıis degen tárizdi sharttar saqtalýy kerek eken.
Sonymen qatar ǵalym damyǵan elderde adamdardyń qazir 80-82 jasqa deıin ómir súretinin jetkizdi. Eń uzaq ǵumyr súretinder búginde Andorra elin mekendeıdi eken - olardyń ómir súrý uzaqtyǵy 84 jasty quraıdy. Sondaı-aq bul kórsetkish boıynsha kósh basynda Japonııa (83,5 jas), Danııa, Shvetsııa, Fınlıandııa men Norvegııa (80 jas) tur.
