Gallup saýalnamasy: JI jumys ónimdiligin arttyrǵanymen, alańdaýshylyq ta týdyrdy
ASTANA. KAZINFORM — Gallup saýalnamasy boıynsha keıbir qyzmetkerler jasandy ıntellektini belsendi qoldanyp, jumystyń ónimdiligin arttyryp otyr. Al basqalary oǵan kúmán keltirip jáne jumysynan aıyrylyp qalýdan qorqyp, qoldanýdan bas tartady, dep habarlaıdy AP.
Gallup derekterine sáıkes, álemde qyzmetkerlerdiń kóp bóligi jumys barysynda jasandy ıntellekt tehnologııalaryn qoldana bastady. Alaıda JI-diń qyzmetine báriniń kózqarasy birdeı emes.
Zertteý nátıjesinde shamamen ár 10 qyzmetkerdiń 3-eýi jasandy ıntellektini turaqty túrde — kún saıyn nemese aptasyna birneshe ret qoldanatyny anyqtalǵan, al shamamen ekeýi ony anda-sanda paıdalanady.
Sonymen qatar, respondentterdiń shamamen 40%-y olardyń uıymdarynda JI quraldary engizilgenin habarlaǵan. Olardyń úshten ekisi bul tehnologııalar ónimdilik pen tıimdilikke oń áser etkenin aıtqan.
Aıyrmashylyq ásirese qyzmetkerler sanattary arasynda aıqyn baıqalady. Basshylar JI-diń paıdasyn jıi kóredi. Menedjerlerdiń shamamen 70%-y tıimdiliktiń artqanyn aıtsa, qatardaǵy qyzmetkerler arasynda bul kórsetkish jartysynan sál joǵary. Eń joǵary nátıje basqarý, tehnologııa jáne medıtsına salalarynda baıqalsa, qyzmet kórsetý sektorynda áseri tómenirek.
Sonymen qatar qyzmetkerlerdiń edáýir bóligi JI-di qoldanýdan sanaly túrde bas tartqan. Olardyń jartysyna jýyǵy muny burynǵy ádetpen, «eski tásilmen jumys isteýdi» jón kórýmen túsindiredi.
Al 40% qyzmetker etıkalyq alańdaýshylyqty, derekter qupııalylyǵyna qatysty qaýipterdi nemese tehnologııanyń paıdaly ekenine kúmán keltirýin alǵa tartady. Keıbiri jasandy ıntellektini synap kórgenimen, ony tıimdi dep sanamaǵan, al basqalary ózderiniń jetkilikti daǵdylary joq ekenin aıtqan.
Taǵy bir mańyzdy faktor — avtomattandyrýdan qorqý. Saýalnama boıynsha qyzmetkerlerdiń 18%-y aldaǵy 5 jylda óz jumysy tehnologııalar, sonyń ishinde JI saldarynan joıylýy múmkin dep esepteıdi. Bul kórsetkish ótken jylmen salystyrǵanda joǵary. Jasandy ıntellekt engizilgen kompanııalarda bul alańdaýshylyq deńgeıi odan da joǵary.
Fox News júrgizgen saýalnamada qatysýshylardyń kópshiligi JI saldarynan jumys oryndary qysqarady dep kútetinin kórsetken, degenmen eleýli bóligi áli naqty pikir qalyptastyrmaǵan.
Zertteý 2026 jyldyń aqpan aıynda AQSh-taǵy 23 myńnan astam jumys isteıtin adam arasynda júrgizilgen.
Aıta keteıik, Qytaı Parkınsonmen aýyratyn naýqastarǵa arnalǵan alǵashqy JI dárigerin iske qosty.
