Ǵalııa Tynbaeva tuńǵysh ret Grand Slam dodasynyń fınalyna shyqty

ASTANA. KAZINFORM – Astanada ótip jatqan dzıýdodan Qazaqstan Barysy Grand Slam jarysynda Ǵalııa Tynbaeva tuńǵysh ret fınalǵa shyqty.

Naqtyraq aıtsaq, 48 kelide el namysyn qorǵap jatqan otandasymyz Tynbaeva shırek fınalda osydan bir apta buryn Dýshanbede ótken týrnırdiń kúmis júldegeri túrkııalyq Týgche Bederden aılasyn asyryp, jartylaı fınalǵa ótken bolatyn.

Al jartylaı fınalda otandasymyz álem chempıonatynyń kúmis júldegeri Shırın Býklımen beldesip, qarsylasyn qapy qaldyrdy. Osylaısha, Tynbaeva tuńǵysh ret ret Grand Slam dodasynyń fınalyna shyqty.

Esterińizge sala keteıik, osyǵan deıin búgin tatamıge shyqqan burymdy balýandarymyzdan Ǵalııa Tynbaevadan ózgesi jappaı utylyp qalǵanyn jazǵan bolatynbyz.

Elorda tórinde ótip jatqan bul jarysta Parıj Olımpıadasynyń sońǵy lıtsenzıalary sarapqa salynyp jatyr. Atalǵan dodaǵa álemniń 92 elinen 519 tatamı sheberi qatysýda. Synǵa túsip jatqan balýandardyń qatarynda 3 Olımpıada, 13 álem chempıony bar.

Bul básekeniń nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. 

Atap aıtqanda, І oryn úshin 1 000, ІІ oryn úshin – 700, al ІІІ oryn úshin – 500 upaı esepteledi.