Galına Voskoboeva Astanada jas tennısshilerge sheberlik sabaǵyn ótkizdi

Jattyǵý barysynda jetkinshekter Voskoboevamen kishigirim saıysqa túsýge múmkindik aldy. Jalpy bul sharaǵa elordada tennıs úıirmesine qatysyp júrgen 100-den astam bala keldi.

«Balalardyń qarasy az bolatyn shyǵar dep oılap edim, men aldyn ala uıymdastyrýshylardan suraǵanymda jetkinshekterdiń sany budan eki ese az edi. Bul keremet! Sheberlik sabaqtary bir kúnniń ishinde balalardy úıretip shyǵý degendi bildirmeıdi, kóbine mundaı kezdesýler jas sportshylardyń jigerin jandyryp, shabytyn qozdyrý úshin, balanyń talapty bolýyna óz úlesińdi qosý maqsatynda ótkiziledi. Oqytýǵa keletin bolsaq, bul kúndelikti aýyr jattyǵýlar, aýyr eńbekpen keletin nárse», - dedi ol.

Onyń aıtýynsha, balalar men olardyń ata-analary búgin kóp kelgeni kóz qýantady, sebebi bul Qazaqstanda tennıstiń qaryshtap kele jatqandyǵynyń belgisi.

«Álemniń eń bedeldi jarystarynda óz baǵyn synap júrgen tájirıbeli kásipqoı sportshymen bir kortta oınaý bólek sezim. Kúndelikti jattyǵýlarǵa ǵana baryp júrgen, endi qanat jaıyp kele jatqan sportshylar úshin ol mańyzdy, sebebi sol arqyly olardyń júreginde qushtarlyq, ot, ynta paıda bolady. Men óz tájirıbemnen bilemin, sen búgin basqa sezimmen kelýiń yqtımal, erteń kelesi Sharapova nemese ekinshi Federer bolamyn degen nyq sezimmen kelýiń múmkin», - deıdi G.Voskoboeva.

Bunyń aldynda ulttyq qurama tennısshisi Almatyda dál osyndaı sheberlik sabaǵyn ótkizgen. Ol kezde de jas balǵyndar kóp qatysty. Astanada ótkizilgen sharadan soń, G.Voskoboeva Shymkent jastaryna óz tájirıbesimen bólisýge attanady.

Eske sala keteıik, sońǵy aıǵa deıin G.Voskoboeva Qazaqstannyń birinshi raketkasy boldy. Alaıda ol aıaǵynan jaraqat alyp, ota jasatqan bolatyn. Sportshy kortqa qashan shyǵatynyn aıta almady.