Ǵalymjan Qoıshybaev BAÁ-de ótken Dúnıejúzilik úkimettik sammıtke qatysty
ASTANA. KAZINFORM — 2025 jylǵy 11 aqpanda R Premer-mınıstriniń orynbasary — Úkimet Apparatynyń basshysy Ǵalymjan Qoıshybaev Dýbaı qalasynda ótip jatqan Dúnıejúzilik úkimettik sammıtine qatysty.
Úkimettiń baspasóz qyzmeti málim etkendeı, sammıt aıasynda Ǵalymjan Qoıshybaev «Qozǵalmaly progress: turaqty elderdi qalyptastyrýdaǵy memlekettik basqarýdyń tıimdiligi» taqyryptyq sessııasynda sóz sóılep, onda memlekettik ınstıtýttardy damytýdaǵy tsıfrlyq transformatsııanyń sheshýshi róline toqtaldy.
— Jyldam ózgeretin álemde syn-qaterlerge tez beıimdelip, memlekettik qyzmetterdi tıimdi kórsete bilý jáne qoǵamnyń senimin saqtap qalý óte mańyzdy máselege aınalýda. Qazaqstannyń tájirıbesi kórsetkendeı, tsıfrlyq transformatsııa memlekettik basqarýdy jańǵyrtýdyń negizgi faktory bolyp sanalady. Búginde biz ozyq baǵdarlamalyq jasaqtama, jasandy ıntellekt, ımmersıvti tehnologııalar, kvanttyq esepteý, robototehnıka jáne bıoınjenerııany qamtıtyn tehnologııalyq revolıýtsııany kórip otyrmyz, — dep atap ótti ol.
Sapar barysynda Ǵalymjan Qoıshybaev BAÁ Mınıstrler kabıneti isteri jónindegi mınıstri Muhammed Abdalla Ál-Gergavımen kelissózder júrgizdi. Ekijaqty seriktestiktiń qazirgi jaǵdaıy men perspektıvalary talqylandy. Memlekettik basqarýdy damytý jáne jańǵyrtý salasyndaǵy buryn qol qoıylǵan yntymaqtastyq týraly Memorandýmdy iske asyrýǵa erekshe nazar aýdaryldy, onyń aıasynda Qazaqstan Úkimetiniń Apparaty BAÁ Úkimettik tájirıbe almasý keńsesimen ózara is-qımyl jasaıdy.
Yntymaqtastyq bastalǵannan beri ondaǵan qazaqstandyq memlekettik qyzmetshiler basqarýdyń ozyq ádisterine oqytyldy. Adamı áleýetti damytý, tsıfrlyq transformatsııa, jasandy ıntellektti qoldaný, básekege qabilettilikti arttyrý jáne t. b. boıynsha jumystar júrgizilýde. Qazaqstan Úkimettik akseleratorlardyń (Government Accelerators) tájirıbesin zerdelep, ozyq ádistemelerdi engizip jatyr.
Mundaı platformalar sheńberinde halyqaralyq ózara is-qımyl memleketaralyq baılanystardy nyǵaıtýǵa jáne qazaqstandyq sheshimderdi jahandyq deńgeıde ilgeriletýge yqpal etedi. 2024 jyly qazaqstandyq «Otbasynyń tsıfrlyq kartasy» jobasy BAÁ-degi Dúnıejúzilik úkimettik sammıtinde «Inklıýzıvti tsıfrlyq transformatsııa» sanatynda 1300 ótinimniń arasynda eń úzdik dep tanyldy.
Sharaǵa birneshe el úkimetteriniń basshylary, halyqaralyq uıymdardyń ókilderi, memlekettik basqarý salasyndaǵy jetekshi sarapshylar, sondaı-aq 100-den astam elden kelgen delegatsııalar qatysty.
Eske salsaq, byltyr Ǵalymjan Qoıshybaev Premer-Mınıstrdiń orynbasary – Úkimet Apparatynyń Basshysy laýazymynda qalǵany habarlandy.