Ǵalymdarǵa 56 kúndik demalys beriledi: Prezıdent zańǵa qol qoıdy
ASTANA. KAZINFORM — Qujat ǵylym, densaýlyq saqtaý, halyqty áleýmettik qorǵaý, bilim berý jáne áskerı qyzmet salalaryndaǵy memlekettik saıasatty jetildirýge baǵyttalǵan.
Memleket basshysy Qasym-Jomart Toqaev «Ǵylym, ǵylymdy qajetsinetin aýmaqtar, áleýmettik qamsyzdandyrý, bilim berý, densaýlyq saqtaý jáne áskerı qyzmet máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zańǵa qol qoıdy.
Zańǵa sáıkes, ǵylymı qalashyqtar men ǵylymı-tehnologııalyq parkter túrindegi ǵylymdy qajetsinetin aýmaqtar qurylady. Olardyń quqyqtyq mártebesi, basqarý tetikteri, qarjylandyrý kózderi jáne memlekettik qoldaý sharalary aıqyndaldy. Sonymen qatar salyqtyq jeńildikter berý, arnaıy ekonomıkalyq aımaqtar rejımin qoldaný jáne memlekettik-jekemenshik áriptestik tetikterin paıdalaný múmkindigi qarastyrylǵan.
Túzetýlerdiń bir bóligi ǵylymdy qarjylandyrý júıesin jetildirýge arnalǵan. Ǵylymı jobalardy kelisimshart jasalǵan sátten bastap zertteý aıaqtalǵanǵa deıingi tolyq tsıkl boıynsha iske asyrý tártibi belgilenedi. Sondaı-aq tájirıbelik-konstrýktorlyq ázirlemelerdi, halyqaralyq ǵylymı yntymaqtastyqty jáne zertteý nátıjelerin kommertsııalandyrýdy qoldaý sharalary kózdelgen.
Qujatta ortaq paıdalanýǵa arnalǵan zerthanalar ınstıtýty engiziledi. Bul ǵalymdardyń, stýdentterdiń jáne jas zertteýshilerdiń ǵylymı jabdyqtar men ınfraqurylymǵa qoljetimdiligin keńeıtýge múmkindik beredi. Sonymen qatar ǵylymı ınfraqurylymdy damytý jáne tsıfrlandyrý sharalary qarastyrylǵan.
Zańmen QR Prezıdenti janyndaǵy Ulttyq ǵylym akademııasynyń qyzmetine qatysty tetikter naqtylandy. Atap aıtqanda, akademııanyń eldegi jetekshi ǵylymı uıym retindegi róli kúsheıtilip, ǵylymnyń jaı-kúıi men damý úrdisteri týraly jyl saıynǵy Ulttyq baıandamany ázirleý mindeti engizildi.
Sondaı-aq zańnamalyq deńgeıde ǵalymdardyń quqyqtary, akademııalyq erkindik jáne ǵylymı sala qyzmetkerleriniń eńbekaqysyn tóleýdiń biryńǵaı tásilderi bekitildi. Budan bólek, barlyq ǵylymı uıym qyzmetkerlerine jyl saıynǵy 56 kúndik aqyly eńbek demalysy beriledi.
Túzetýler densaýlyq saqtaý salasyn da qamtıdy. Atap aıtqanda, dárilik zattardy tirkeý rásimderi ońtaılandyrylyp, keshendi memlekettik qyzmet engiziledi. Bul tirkeý merzimin eki ese jyldamdatýǵa múmkindik beredi.
Sondaı-aq dárilik preparattardyń sapasyn baqylaýdy kúsheıtý jáne referens-ortalyqtardy damytý boıynsha qosymsha sharalar qarastyrylǵan.
Budan bólek, uzaq ýaqyt koma jaǵdaıynda jatqan azamattardyń quqyqtaryn qorǵaý maqsatynda olardyń týystaryna múgedektikti rásimdeý úshin ótinish berý múmkindigi beriledi.
Atalǵan qujatty buǵan deıin Qazaqstan Respýblıkasy Parlamentiniń Senaty qarap, maquldaǵan bolatyn.
Aıta keteıik, Memleket basshysy birqatar zańǵa qol qoıdy.
